«Այսօր՝ վաղ առավոտյան, մարտական գործողությունները նորից վերսկսել են նոր թափով, ինչպես հյուսիսում, այնպես էլ հարավում։ Հյուսիսում այսօր ավելի ինտենսիվ մարտական գործողություններ են ընթացել, քան նախորդ օրը, բայց ավելի ծանր մարտեր են ընթացել հարավային ուղղությամբ։ Այս մասին ասուլիսում ասաց ՊՆ ներկայացուցիչ Արծրուն Հովհաննիսյանի՝
«Հայկական զինված ուժերը շարունակում են դիմադրել հակառակորդի հարձակողական նկրտումներին և անհրաժեշտ հակահարված տալով ետ շպրտել ելման դիրքեր։ Այսօր հակառակորդը նորից որոշակի կորուստներ է կրել, այս պահին մարտերը շարունակվում են»,- նշեց ՊՆ ներկայացուցիչը։
Նրա խոսքով՝ այսօր ադրբեջանական պաշտոնական լրատվամիջոցներն ու շրջանակները որերորդ անգամ հայտարարեցին, թե գրավել են Հադրութն ու Ջեբրայիլը։ «Դա ծիծաղելի է, որովհետև հենց հայտարարությունների ժամանակ Հադրութում էի, ավելին ասեմ՝ կոնկրետ այդ ուղղությամբ, այսինքն՝ մերձարաքսյան հովտից մի փոքր ավելի հյուսիս, ընդհանրապես մարտական գործողություններ չկային»,- նշեց Հովհաննիսյանը։
«Ամբողջ ցերեկվա ընթացքում հակառակորդը շարունակել է հրթիռակոծել Ստեփանակերտը։Այսօր ես իմ աչքերով տեսա նաև Շուշիում եկեղեցու համապատասխան փլվածքը։ Ըստ էության, եկեղեցու մեկ հատվածում ուղիղ, գերճշգրիտ հարված է հասցվել երկու անգամ։ Դա ոչ մի կերպ չի կարող լինել պատահական հարված»,- նշեց ՊՆ ներկայացուցիչը։
