Ուժեղինն է իրավունքը: Մեր հերոս տղաների, մեր առյուծների ռազմական հաջողությունները և նրանց հերոսական ոգին մեզ օգնում է պայքարել նաև անտեսանելի ճակատում՝ իրավունքի ճակատում: Այս մասին «Առաջին լրատվական»-ի հետ զրույցում ասաց Բարձրագույն դատական խորհրդի անդամ Հայկ Հովհաննիսյանը:
«Մենք ձեռքներս ծալած չենք նստում: Պատերազմի առաջին իսկ օրից կապի մեջ ենք մեր բոլոր միջազգային գործընկերների, դատավորական համայնքի հետ, ԲԴԽ-ն, որպես մարմին, և դատավորներն իրենց անձնական կապերով աշխատանքներ են իրականացնում. մեր գլխավոր խնդիրը մեր արդար պահանջը լսելի և հասկանալի դարձնելն է միջազգային բոլոր հարթակներում: Կարծես թե մեզ հաջողվում է աշխարհի իրավաբանական և դատավորական համայնքի ուշադրությունը բևեռել այս խնդրի վրա»,- նշեց ԲԴԽ անդամը:
Հայկ Հովհաննիսյանը կարևորեց ՀՀ կառավարության դիմումի հիման վրա ՄԻԵԴ-ում գրանցված հաջողությունը՝ կապված միջանկյալ միջոց կիրառելու վերաբերյալ որոշում կայացնելու հետ. «Եթե չհաջողվի Թուրքիային քաղաքական և դիվանագիտական մեթոդներով ստիպել, որ դադարեցնի իր աջակցությամբ սանձազերծված ագրեսիան, ուրեմն մենք պետք է կարողանանք զենքի ուժով դա անել: Եվ մեր տղաները դա անում են: Փոխկապակցված աշխատանք է գնում, ամեն ինչ արվում է հաղթանակի համար»:
Թուրքիայի և Ադրբեջանի նախաձեռնությամբ ռազմաճակատում ահաբեկիչների ներգրավման վերաբերյալ Հայկ Հովհաննիսյանը նշեց, որ այն պահից սկսած, երբ ՌԴ արտաքին հետախուզության ծառայության պետը հայտարարեց այդ մասին, ռուսական իրավաբանական փորձագիտական խմբերը սկսել են մշակել այն հայեցակարգը, թե ինչպիսի իրավունք է դա վերապահում ՌԴ-ին ուղղակիորեն կետային հարվածներ հասցնելու իրենց օդային և տիեզերական ուժերի միջոցով ճակատամարտի գծի երկայնքով: Նա նաև հավելեց, որ միջազգային ահաբեկչական խմբավորումների դեմ կարելի է և պետք է, որ ՌԴ-ն պայքարի նաև արցախյան ճակատամարտում. « Կարևոր հանգամանք է նաև, որ Ֆրանսիայի նախագահ Մակրոնը նույնպես փաստում է ահաբեկիչների ներգրավման մասին: Մենք մեր տեղեկություններով օգնում ենք մեր դաշնակիցներին, որպեսզի իրավաբանորեն հիմնավոր լինի ահաբեկիչներին հարվածներ հասցնելու վերաբերյալ նրանց որոշումը»:
Հայկ Հովհաննիսյանը նաև ընդգծեց, որ աշխարհը տեսնում է՝ ինչ է կատարվում. «Էրդողանը և Ալիևը ռազմական հանցագործ են, նրանք կպատժվեն»:
Մանարամասն՝ տեսանյութում:
