«Թուրքիան լուրջ աշխարհաքաղաքական տրանսֆորմացիաների հայտ է ներկայացրել, որը չի կարող չանհանգստացնել և առավել ևս անտարբեր թողնել բազմաթիվ երկրների»,- «Առաջին լրատվական»-ի հետ զրույցում նման տեսակետ հայտնեց Արցախի նախագահ Արայիկ Հարությունյանի՝ անվտանգության հարցերով խորհրդական Դավիթ Բաբայանը։
Նրա կարծիքով՝ այն աշխարհաքաղաքական հավասարակշռվածությունը, որ եղել է, պետք է վերականգնվի, և տարբեր երկրների արձագանքները հենց դրա մասին են վկայում. «Այս ամենի մեջ հատուկ կարևորություն ունի նաև պատերազմի դադարեցումը՝ Թուրքիայի, Ադրբեջանի ու ահաբեկիչների կողմից սանձազերծած ագրեսիայի դադարեցումը»։
Մեր զրուցակիցը նաև ընդգծեց, որ դեմ է ամպագոռգոռ հայտարարություններին. «Ընդհանրապես չեմ սիրում հաղթանակի մասին բացականչությունները։ Հաղթանակը ի՞նչ է՝ հարաբերական բան է։ Եթե մենք դիմակայում ենք ու պահպանում մեր երկրի անկախությունը՝ դա արդեն հաղթանակ է։ Դեմագոգ հայտարարությունները երկրորդական են։ Այս պահի դրությամբ պետք է մաքսիմալ փրկել մարդկանց կյանքերը ու մաքսիմալ վնաս հասցնել հակառակորդին։
Հենց դա է հաղթանակը։ Չկառչենք ինչ-որ գաղափարների հետևից։ Անկասկած հաղթանակը մերն է լինելու, Արցախն ու Հայաստանը պետք է փրկվեն ու փրկվելու են։ Իսկ դրա համար առաջին հերթին մեր տղաներն են արյուն թափում։ Մենք պետք է նաև ճիշտ աշխարհաքաղաքականություն վարենք, մենք պետք է ունենանք պրոֆեսիոնալ ու հայրենասեր վերնախավ։ Պետք է ամեն ինչ անենք, որ նման բան չլինի»։
Ո՞րն է հակամարտության լուծման մեր պատկերացումը՝ հարցին ի պատասխան Բաբայանն ասաց. «Կան մարտավարական ու ռազմավարական քայլեր։ Ռազմավարական տիրույթը աշխարհաքաղաքական հավասարակշռության պահպանումն է։
Մարտավարականը դրա ձևերն են։ Ռազմաքաղաքական հավասարակշռվածությունը պետք է պահպանվի ու պահպանվելու է։ Դրա համար իրենց ջանքերն են ներդնելու նաև գերտերությունները։ Սա պարզ է։ Մարտավարականը, այսինքն՝ ինչ ձևով տեղի կունենա՝ Արցախը կմնա չճանաչված երկիր, թե կմիանա Մայր Հայաստանին, մենք փաստորեն ունենք այդ երկու տարբերակը։ Եվ դա ցույց կտա ժամանակը, մենք զգացմունքներով չէ, որ պետք է առաջնորդվենք։
Պետք է առաջնորդվենք պրոֆեսիոնալիզմով, հաշվարկներով և նաև հասկանանք տարբեր երկրների շահերն ու ձգտումները»։
