Ադրբեջանական 1news.az-ի փոխանցմամբ՝ Ադրբեջանի անկախության 20-ամյակին նվիրված The Business Year – The Business Year-Azerbaijan 2011 պարբերականի հատուկ համարում տեղ են գտել ռուս-ադրբեջանական հարաբերություններին ու ղարաբաղյան հակամարտության կարգավորմանն առնչվող Ռուսաստանի նախագահ Դմիտրի Մեդվեդևի մեկնաբանությունները.
«Ռուսաստանն ու Ադրբեջանը երկու ռազմավարական գործընկերներ են, երկու երկրները կապված են ջերմ և բարեկամական հարաբերություններով։ Տարածաշրջանային խնդիրները մշտապես գտնվում են մեր ուշադրության ներքո, և մենք դրանք քննարկում ենք Ադրբեջանի հետ։ Դա մասնավորապես վերաբերում է Կասպիցին առնչվող խնդիրներին։
Ռուսաստանն ու Ադրբեջանն էներգետիկ ոլորտում խոշոր խաղացողներ են և ունեն բազմաթիվ ընդհանուր շահեր, քանի որ արդյունահանում ու արտահանում են էներգակիրներ։ Հետևաբար, անհրաժեշտ է տվյալ ոլորտում ավելի սերտորեն համագործակցել միմյանց հետ։
Ռուսաստանի համար շատ կարևոր է Կովկասում կայունության պահպանումը։ Դա այն հիմնական հայեցակարգն է, որի հիման վրա մենք կառուցում ենք մեր հարաբերություններն Ադրբեջանի հետ։ Մենք շահագրգռված ենք տարածաշրջանում խաղաղության ու կայունության պահպանմամբ։
Հենց այդ համատեքստում պետք է դիտարկել Գյումրիի ռուսական ռազմաբազայի ժամկետի երկարաձգումը, ինչը տեղի ունեցավ իմ երևանյան այցի ժամանակ։ Ռազմաբազան կոչված է ապահովել խաղաղություն ու կարգուկանոն, պահպանել կայունություն և նվազեցնել ներկայիս բարդությունները։
Մոսկվան միջնորդական առաքելություն է ստանձնել ղարաբաղյան հակամարտության կարգավորման հարցում։ Իմ մասնակցությամբ Հայաստանի ու Ադրբեջանի նախագահների հանդիպումների հաճախակիությունը հասել է իր պատմական գագաթնակետին։ Ոչ վաղ անցյալում խոսելով տվյալ թեմայի շուրջ՝ ես ընդգծեցի, որ չեմ ամաչում մեր կատարած աշխատանքից։ Դրանք կարևոր քննարկումներ էին, որոնց ընթացքում ընդգծվեցին տվյալ գործընթացում առկա մի շարք բարդություններ։
Սակայն ամեն դեպքում այդ ջանքերը որոշակի արդյունք են բերում, և բանակցությունները շարունակվում են։ Իմ կարծիքով՝ տվյալ շփումների ինտենսիվությունը չպետք է նվազեցնել։ Ռուսաստանը պատրաստ է պատասխանատվություն կրել ԵԱՀԿ Մինսկի խմբի շրջանակներում ստանձնած պարտավորությունների համար։
Հարևան երկրների նկատմամբ Ռուսաստանի բարոյական պարտքը տվյալ խնդրի շուրջ նրանց միջև երկխոսության շարունակման բարելավումն է։ Անձամբ ես պատրաստ եմ նպաստել այդ շփումներին և բանակցությունների օրակարգում քննարկման դնել ավելի բարդ հարցեր։ Հուսով եմ, որ մոտ ապագայում մենք կշարունակենք մեր և մեր արտգործնախարարների մասնակցությամբ համանման խորհրդակցությունները։
Ռուսաստանը լրջորեն հավատարիմ է մնալու իր ստանձնած պարտավորություններին և ձեռնարկելու է համապատասխան քայլեր՝ անհրաժեշտ արդյունքի հասնելուն նպաստելու համար։ Այդ արդյունքը, հիրավի, կենսականորեն անհրաժեշտ է, քանի որ այն ի վիճակի է իր հետ ռուսական շահերի գոտում գտնվող տարածաշրջան բերել երկարատև խաղաղություն և անվտանգություն»։
