Իրանի արտգործնախարարության խոսնակ Սաիդ Խաթիբզադեն հայտարարել է, թե Թեհրանը պլան է մշակել, որը կարող է վերջ դնել տասնամյակներ շարունակվող ղարաբաղյան հակամարտությանը։ Իրանցի պաշտոնյան, սակայն, այլ մանրամասներ չի հայտնել։ Խաթիբզադեն հարևան հակամարտող երկրներին վերստին կոչ է արել անհապաղ դադարեցնել կրակը և քաղաքական երկխոսություն սկսել:
Լեռնային Ղարաբաղում շարունակվող ռազմական գործողությունների հետևանքով, որոնց մի մասը տեղի է ունենում Իրանի հետ անմիջական սահմանին, վնասներ են հասցվել նաև իրանական սահմանամերձ բնակավայրերին, ինչի հետևանքով այդ երկրում տուժել են խաղաղ բնակիչներ, այդ թվում՝ 6-ամյա երեխա։
ՄԱՀՀԻ ասոցացված փորձագետ, իրանագետ Էմմա Բեգիջանյանը, սակայն, Իրանի նախաձեռնողականության առումով հոռետես է։ Նա «Առաջին լրատվական»-ի հետ զրույցում նշեց՝ ի պատիվ իրեն՝ Իրանն ավելի հայանպաստ դիրքորոշում է որդեգրել հակամարտության կարգավորման հետ կապված, քան, օրինակ, հարևան Վրաստանը և իրենց բարեկամ համարող շատ այլ երկրներ։ Բայց միևնույն ժամանակ Թեհրանի ձեռքերը բաց չեն, և դժվար է հավատալ, թե նա կկարողանա գործուն ազդեցություն ունենալ հակամարտության կարգավորման վրա. «Բոլորն են ջանքեր գործադրում, տարբեր հայտարարություններ անում։ Իրադարձությունները տեղի են ունենում անմիջապես Իրանի սահմանին, հատկապես այն վայրում, որտեղ ապրում են թրքախոս իրանցիները, որոնք ադրբեջանա-թուրքական քարոզչության տակ են։ Իրանը շահագրգիռ է, որ հակամարտությունը շուտափույթ ավարտվի, բայց Թեհրանը չի կարող իր բազմիցս արտահայտած տեսակետներից շեղվել՝ չնայած իր սեփական հետաքրքրություններին»։
Էմմա Բեգիջանյանի խոսքով՝ ո՛չ Թուրքիան, ոչ էլ Իրանը չեն կարող հակամարտության կարգավորման միջնորդ լինել. «Չգիտեմ, թե ինչ է նկատի ունեցել Իրանի ԱԳՆ խոսնակը, բայց հիշեցնեմ, որ նմանատիպ մի նախաձեռնությամբ Թեհրանը հանդես եկավ 90-ականներին, բայց հիմա իրավիճակը լիովին այլ է։ Այն ժամանակ Իրանի թրքախոսները չէին գտնվում պանթուրքիստական քարոզչության ներքո։ Հիմա Իրանի համար բավականին բարդ իրավիճակ է։ Նշեմ, որ Իրանը հիմա շատ ավելի դրական դիրքորոշում ունի, քան բարեկամ այլ երկրները, բայց փաստը մնում է փաստ՝ Իրանի ձեռքերը այնքան էլ բաց չեն, որ կարողանա անկողմնակալ միջնորդի դեր կատարել»։
