Իրանի արտգործնախարարության խոսնակ Սաիդ Խաթիբզադեն հայտարարել է, թե Թեհրանը պլան է մշակել, որը կարող է վերջ դնել տասնամյակներ շարունակվող ղարաբաղյան հակամարտությանը։ Իրանցի պաշտոնյան, սակայն, այլ մանրամասներ չի հայտնել։ Խաթիբզադեն հարևան հակամարտող երկրներին վերստին կոչ է արել անհապաղ դադարեցնել կրակը և քաղաքական երկխոսություն սկսել: Լեռնային Ղարաբաղում շարունակվող ռազմական գործողությունների հետևանքով, որոնց մի մասը տեղի է ունենում Իրանի հետ անմիջական սահմանին, վնաս են հասցվել նաև իրանական սահմանամերձ բնակավայրերին, ինչի հետևանքով այդ երկրում տուժել են խաղաղ բնակիչներ, այդ թվում՝ 6-ամյա երեխա։
Իրանագետ Արմեն Վարդանյանի համար հասկանալի չէ, թե ինչ պլանի մասին է խոսում իրանցի պաշտոնյան։ Միևնույն ժամանակ այս լարված օրերին նման հայտարարություններն էլ չեն կարող պատահական լինել։ Դրանից զատ, սակայն, Վարդանյանը մտահոգիչ է համարում այն, որ Իրանի արտգործնախարարության խոսնակը իր հայտարարության մեջ նշում է, որ Իրանը ճանաչել է Ադրբեջանի տարածքային ամբողջականությունը և կոչ է արել Հայաստանին զորքերը դուրս բերել գրավյալ քաղաքներից:
«Սա իրոք մտահոգիչ է, բայց թե ինչ պլանի մասին է խոսքը, դեռևս պատկերացում չկա։ Ամենայն հավանականությամբ փորձ կարվի կողմերին նստեցնել բանակցային սեղանի շուրջ, սակայն չեմ էլ կարծում, որ Իրանն այս հարցում կարող է որևէ հաջողության հասնել»,- «Առաջին լրատվական»-ի հետ զրույցում ասաց Վարդանյանը՝ հավելելով, որ Հայաստանի իշխանությունները պետք է դիվանագիտական խողովակներով իրանական կողմից պարզաբանումներ պահանջեն. «Բայց դա պետք է արվի դիվանագիտական ճանապարհով, քանի որ այս փուլում մենք իրավունք չունենք բացահայտ առճակատման մեջ մտնելու Իրանի հետ։ Մանավանդ Հայաստանը բազմաթիվ այլ երկրների հետ թեկուզ բանավոր առճակատման մեջ է Իսրայելի զենքի վաճառքի հետ կապված և այլն։ Դիվանագիտական ճանապարհով, այո, պետք է պարզաբանումներ ստանանք։ Մնացածով՝ բանակցությունների մասով, ԵԱՀԿ Մինսկի խմբի համանախագահները զբաղվում են, և կարծում եմ, որ Իրանը որևէ շանս չունի կողմերին նստեցնելու բանակցային սեղանի շուրջ»։
Նշենք, որ Իրանի Մեջլիսի մի խումբ անդամներ էլ հոկտեմբերի 4-ին այցելել էին Լեռնային Ղարաբաղի սահման:
Իսլամական Հանրապետության խորհրդարանի ազգային անվտանգության և արտաքին քաղաքականության հարցերի հանձնաժողովի պաշտոնական ներկայացուցիչ Աբոլֆազլ Ամուեյը հայտնել էր, որ հանձնաժողովի մի շարք անդամներ մեկնել են Լեռնային Ղարաբաղին հարող սահմանամերձ իրանական շրջան: Ըստ Ամուեյի՝ այցի նպատակը Լեռնային Ղարաբաղում տեղի ունեցած իրադարձությունների քննարկումն էր։ Նշվում է, որ սեպտեմբերի 27-ից ԼՂ հակամարտության գոտում լայնամասշտաբ ռազմական գործողությունների վերսկսումից ի վեր ավելի քան 20 արկեր են ընկել Իրանի Արդեբիլ նահանգի հյուսիս-արևմուտքում գտնվող Ասլանդոզ շրջանում: Թեհրանը նշել է կրակի դադարեցման և երկխոսության միջոցով ղարաբաղյան հակամարտության լուծման անհրաժեշտությունը, ինչպես նաև երկու կողմերին նախազգուշացրել է իրանական տարածքում պատահական կրակի բացման հետևանքների մասին։ Հայտարարելով, որ Ադրբեջանի կամ Հայաստանի կողմից Իրանի նկատմամբ ցանկացած ագրեսիա անթույլատրելի է, ԻԻՀ ԱԳՆ պաշտոնական ներկայացուցիչ Սայիդ Խաթիբզադեն շաբաթ օրը՝ հոկտեմբերի 3-ին, նախազգուշացրել է ղարաբաղյան հակամարտության մեջ ներգրավված երկու երկրներին այդ հարցում միջոցներ ձեռնարկելու անհրաժեշտության մասին՝ հավելում է պարբերականը:
Արմեն Վարդանյանի խոսքով՝ եթե ռազմական գործողությունները չդադարեն, և նման դեպքերը կրկնվեն, ապա բացառված չէ, որ Իրանը ինչ-որ կերպ ներգրավվի, ինչը, սակայն, չի լինի ուղիղ ռազմական միջամտություն։ Ամենայն հավանականությամբ կողմերի վրա ճնշումներ կգործադրվեն դիվանագիտական ճանապարհներով։
