Պարզվում է` մի քանի օր առաջ ԱԱԾ-ում տեղի ունեցած կադրային փոփոխությունը ոչ այնքան պետական, որքան` անձնական դրդապատճառներով է տեղի ունեցել:
Ինչպես հայտնի է, նոյեմբերի 19-ին Սերժ Սարգսյանը հրամանագիր է ստորագրել, որով պաշտոնանկ է արել ԱԱԾ տնօրենի տեղակալ Արմեն Դարբինյանին և այդ պաշտոնում նշանակել Գարեգին Մխիթարյանին: Թե ինչով էր պայմանավորված այդ պաշտոնանկությունը` որևէ պաշտոնական հիմնավորում չի տրվել: Պարզվում է, սակայն, իրական հիմնավորումը բավական ուշագրավ է, և որևէ կապ չունի այն լրտեսական սկանդալի հետ, որի մեջ Արմեն Դարբինյանը հայտնվել էր այս տարվա ամռանը, երբ ռուսական մամուլում վերջինիս հետ կապված հետաքրքիր հրապարակումներ հայտնվեցին:
Հիշեցնենք, որ այս տարվա հուլիսին ռուսական http//lubyanskayapravda.com կայքէջում մի ուշագրավ հրապարակում էր հայտնվել՝ Армянский шпион խորագրով: Ըստ այդ հրապարակման` ռուսական հատուկ ծառայությունների գործերի կառավարման աշխատակից, ոմն Չեկունովը` «հույժ գաղտնի» գրիֆով նամակ էր հղել ՌԴ այն ժամանակվա նախագահ Վլադիմիր Պուտինին (փաստաթուղթը թվագրված էր 20.09.2004-ով), որով միջնորդություն էր ներկայացնում՝ ՀՀ քաղաքացի Դարբինյան Արմեն Վաղինակովիչին շնորհել ՌԴ քաղաքացիություն՝ «հաշվի առնելով նրա անձնական ծառայությունը ՌԴ-ին»: Թե խոսքը ինչ ծառայությունների մասին էր` փաստաթղթում նշված չէր, սակայն ՌԴ նախագահի անունով արդեն իսկ նմանաբովանդակ նամակ ուղղելը, թերևս, ամեն ինչ ասում էր: Նույն կայքում, սակայն, տեղադրվել էր ևս մեկ փաստաթուղթ, որը արդեն մեկ տարի անց թվագրությամբ էր: Պուտինին հասցեագրված նամակի պատճենն այս անգամ ռուսական ԱԱԾ մեկ այլ պաշտոնյայի՝ Կրիկունով Ա.Վ.-ի անունից էր (27.06.2005 թվականին), նույնպես «հույժ գաղտնի» գրիֆով և ուղարկված էր Պուտինի տեղակալին: Ուշագրավն այն է, որ այս փաստաթղթերի հրապարակումից հետո հայկական կողմը որևէ ձևով չէր արձագանքել, չնայած ցանկացած նորմալ երկրի համար պետք է որ առնվազն ամոթալի լիներ այն հանգամանքը, որ այդ երկրի անվտանգության ծառայության բարձրաստիճան պաշտոնյայի անունը նման խայտառակ պատմության մեջ է շոշափվում, ինչը այլ կերպ, քան լրտեսի բացահայտում դժվար է անվանել: Հայաստանի իշխանությունները, սակայն, նախընտրել էին լռել և անգամ ձևական պատասխանատվության չենթարկել ռուսական լրտեսին, մինչդեռ այդ փաստաթղթի հրապարակումից մոտ կես տարի անց հանկարծ պարզվում է` ռուսական լրտեսը պաշտոնանկ է արվել:
Առաջին հայացքից կարող է թվալ, թե Սերժ Սարգսյանն ի վերջո հասկացել է, թե որքան վտանգավոր բան է, երբ նման բարձրաստիճան պաշտոնյաները այլ երկրների լրտեսներ են լինում: Սակայն իրականում, պարզվում է, Դարբինյանին ազատել են միմիայն անձնական պատճառներով, և Սերժ Սարգսյանն էլ վերջինիս դեմ է դուրս եկել ոչ թե այն պատճառով, որ Դարբինյանը հայկական պետության համար վտանգավոր քայլեր է արել, այլ` որովհետև Սարգսյանը կասկածներ է ունեցել առ այն, որ Դարբինյանն անձամբ իր հետ կապված քայլեր է արել: Ինչպես հաղորդում են ԱԱԾ մեր աղբյուրները, Դարբինյանի պաշտոնանկությունից ընդամենը երկու օր առաջ, վաղ առավոտյան փակ համարից զանգ է գալիս ԱԱԾ հերթապահ մաս: Զանգահարողը ներկայանում է որպես ազգությամբ վրացի «օրենքով գող», խոսում է ռուսերենով և հերթապահին ասում է, թե Արմեն Դարբինյանին փոխանցեն, որ ինքը կոնկրետ ծրագրեր ունի Հայաստանի իշխանությունների դեմ, և ըստ այդմ` իբր նախատեսում է մահափորձեր կազմակերպել մի շարք օլիգարխների և մասնավորապես ԱԺ պատգամավոր Սամվել Ալեքսանյանի` Լֆիկ Սամոյի, ինչպես նաև հենց Սերժ Սարգսյանի դեմ: Զանգից հետո, ՀՀ ԱԱԾ-ն, մեր տեղեկություններով, փորձում է գտնել զանգահարողին, ինչի արդյունքում պարզվում է, որ նա զանգահարել է Մոսկվայի փողոցներից մեկից` տաքսաֆոնից: Ավելին, պարզվում է նաև, որ ազգությամբ վրացի «օրենքով գողը», որի անունով ներկայացել էր զանգահարողը, իրականում իրոք գոյություն ունի, սակայն վերջինս չէր կարող զանգահարել Մոսկվայի փողոցներից, քանի որ այս տարվա հունվարից ՌԴ իրավապահները նրան ձերբակալել էին` թմրանյութեր պահելու և տարածելու համար: Կարճ ասած` մեր անվտանգության աշխատակիցները կորցնում են զանգահարողի հետքը, սակայն դեպքի մասին անմիջապես կազմվում է համապատասխան զեկույց, որը հաջորդ իսկ օրը հայտնվում է Սերժ Սարգսյանի սեղանին, իսկ արդեն դրա հաջորդ օրը` Սարգսյանը Դարբինյանին պաշտոնանկ է անում:
Փաստորեն, մի քանի ամիս շարունակ իմանալով Դարբինյանի լրտեսական հակումների մասին` Սերժ Սարգսյանը որևէ քայլ չէր ձեռնարկել վերջինիս դեմ, սակայն երբ խոսքը վերաբերել էր իր անձին, առանց աչքը թարթելու պաշտոնանկ է արել ԱԱԾ արդեն նախկին փոխտնօրենին` փաստորեն առաջնորդվելով «պետության դեմ ինչ ուզում եք արեք, իմ դեմ` ոչինչ» սկզբունքով: Նշենք, սակայն, որ ԱԱԾ մեր աղբյուրների փոխանցմամբ, Արմեն Դարբինյանը պաշտոնանկությունից հետո բողոքել է, թե այդ զանգը իրականում սարքված է եղել, և սարքված է եղել իր դեմ. ըստ այդ վարկածի` քայլի հեղինակն էլ ԱԱԾ տնօրեն Գորիկ Հակոբյանն է եղել: Ինչպես հայտնի է, Գորիկ Հակոբյանը առողջական լուրջ խնդիրներ ունի և այսօր-վաղը պետք է ազատի ԱԱԾ տնօրենի պաշտոնը: Այդ պատճառով ԱԱԾ-ում Հակոբյանի իրավահաջորդների լուրջ պայքար է սկսվել: Մինչդեռ ինքը` Գորիկ Հակոբյանը, ըստ ԱԱԾ մեր աղբյուրների, որոշել է գնալուց առաջ չեզոքացնել բոլոր հավանական թեկնածուներին, որպեսզի ճանապարհ հարթի իր մեկ այլ տեղակալի` Ռոմիկ Հարությունյանի համար, ով ի դեպ, ըստ որոշ տեղեկությունների, Գորիկ Հակոբյանի ազգականն է, ճիշտ այնպես, ինչպես ԱԱԾ Շիրակի մարզային վարչության պետ Աշոտ Ղահրամանյանը: Ու քանի որ Արմեն Դարբինյանը համարվում էր ԱԱԾ տնօրենի ամենահավանական թեկնածուն, հենց այդ պատճառով էլ Հակոբյանը առաջին հերթին որոշել է ազատվել Դարբինյանից:
