Դիվանագետ, ԼՂՀ արտաքին գործերի նախկին նախարար Արման Մելիքյանը, մեկնաբանելով ԱՄՆ Կոնգրեսի՝ 2010 թ. Լեռնային Ղարաբաղի Հանրապետությանը հումանիտար օգնություն չտրամադրելու հարցը, «Առաջին լրատվականի» հետ զրույցում ասաց, որ պատճառը գուցե այն է, որ Միացյալ Նահանգները բավարարված չեն ԼՂ հիմնախնդրի շուրջ բանակցությունների արդյունավետությամբ:
«Լեռնային Ղարաբաղին գումար չտրամադրելը կարող է նշանակել, որ հայկական կողմի վրա որոշակի ճնշում է գործադրվում»,- ասաց Ա.Մելիքյանը՝ չբացառելով, որ Լեռնային Ղարաբաղի հարցն ավելի ուշ քննարկվի, և կախված նրանից, թե ինչպես կզարգանան ԼՂ հիմնախնդրի շուրջ բանակցությունները բանակցային սեղանի շուրջ, Միացյալ Նահանգները կարող է անգամ փոխել դիրքորոշումը:
«Չի բացառվում, որ Միացյալ Նահանգներն ուղղակիորեն օգնություն տրամադրի Լեռնային Ղարաբաղի իշխանություններին: Մի բան, որ առ այսօր չի կատարվել»,- նշեց նա՝ պարզաբանելով, որ մինչ օրս օգնությունը ԼՂՀ-ին տրվել է անուղղակի:
«Այն օգնությունը, որ մինչ օրս տրամադրել է ԱՄՆ-ը, տրամադրել է ոչ կառավարական կազմակերպություններին՝ ԼՂՀ տարածքում ինչ-ինչ ծրագրեր իրականացնելու համար, բայց պաշտոնական իշխանություններն այդ գումարի հետ կապ չեն ունեցել»,- նշեց դիվանագետը:
