2011 թ. հունվար-մարտին տնտեսության իրական հատվածում օտարերկրյա ներդրումների հոսքերի ծավալը (առանց պետական կառավարման և բանկային համակարգով ստացվածի) կազմել է 130.6 մլն դոլար, որը 2010 թ. նույն ժամանակաշրջանի համեմատ նվազել է 19.5%-ով, որից ուղղակի ներդրումների ծավալը կազմել է 93.7 մլն դոլար և նվազել 19.9%-ով:
Ազգային վիճակագրական ծառայության համաձայն, 2011 թ. հունվար-մարտին իրական հատվածում կատարված օտարերկրյա ներդրումների 32.06%-ը, իսկ ուղղակի ներդրումների 42.94%-ն ուղղվել է հեռահաղորդակցության ոլորտ: Ուղղակի ներդրումների 12.92%-ն իրականացվել է հանքագործական արդյունաբերության և բացհանքերի շահագործման այլ ճյուղերի, իսկ 9.95%-ը` մետաղական հանքաքարերի արդյունահանման ոլորտներում:
ՀՀ տնտեսության իրական հատվածում կատարած ներդրումների առումով առաջատարը Ռուսաստանն է, որը 2010 թ-ին ՀՀ տնտեսությունում ուղղակի ներդրել է 194 մլն 539.8 հզ. դոլար (ընդհանուրի շուրջ 40%), ՌԴ-ին հետևում է Ֆրանսիան՝ 146 մլն 787.2 հզ. դոլար (ընդհանուրի շուրջ 30%),Արգենտինան՝ 29 մլն 751.8 հզ. դոլար (ընդհանուրի շուրջ 6%), Գերմանիան՝ 21 մլն 951.2 հզ. դոլար (ընդհանուրի շուրջ 4.5%), Կիպրոսը՝ 11 մլն 975.9 հզ. դոլար (ընդհանուրի շուրջ 2.5%):
Այս տարվա ներդրող երկրների առաջնահերթությունը փոխվել է. Ռուսաստանից ուղղակի ներդրումները պակասել են (13 մլն 992.5 հզ. դոլար կամ ընդհանուրի 14.9%)՝ առաջին հորիզոնականը զիջելով Ֆրանսիային (37 մլն 711.9 հզ. դոլար կամ ընդհանուրի 40.3%), 3-րդ տեղում է Գերմանիան (12 մլն 108.0 հզ. դոլար կամ ընդհանուրի 12.9%), 4-րդը՝ ԱՄՆ (8 մլն 207.2 հզ. դոլար կամ ընդհանուրի 8.8%), 5-րդը՝ Իտալիան (3 մլն 504.6 հզ. դոլար կամ ընդհանուրի 3.7%):
Թե՛ անցած տարի, թե՛ այս տարվա առաջին եռամսյակում ուղղակի ներդրումները կրճատվել են, համատասխանաբար՝ 36%-ով և 19.9%-ով:
