Միջազգային արձագանքը կարևոր դեր է խաղում, դա նաև զսպիչ մեխանիզմ է: Այս մասին «Առաջին լրատվական»-ի հետ զրույցում ասաց «Գլոբալիզացիայի և տարածաշրջանային համագործակցության կենտրոնի» ղեկավար, քաղաքագետ Ստեփան Գրիգորյանը՝ անդրադառնալով ղարաբաղա-ադրբեջանական սահմանագոտում հակառակորդի կողմից սանձազերծված ռազմական լայնամասշտաբ գործողությունների վերաբերյալ միջազգային արձագանքներին:
Քաղաքագետի խոսքով՝ տարբեր երկրներ շատ ավելի օբյեկտիվ, հավասարակշռված արձագանքեցին, քան նախկինում: «Ե՛վ Ադրբեջանին, և՛ Հայաստանին կոչ են անում խաղաղ լուծել Ղարաբաղի հարցը, բոլոր երկրները հավասարակշռված դիրքորոշում ունեն, միայն մի երկիր՝ Թուրքիան ասաց, որ իբրև թե Հայաստանն է սկսել ագրեսիան»,- նշեց Ս. Գրիգորյանը: Նրա դիտարկմամբ՝ հօգուտ Ադրբեջանի Թուրքաիայի հայտարարությունները նպաստում են, որ Թուրքիայի նկատմամբ մեծ թվով երկրների ատելությունն ավելի ուժեղանա. «Անկարայի այդպիսի դիրքորոշումը հօգուտ մեզ է աշխատում»:
Քաղաքագետի կարծիքով՝ Նիկոլ Փաշինյանը մինչև պատժիչ գործողություններ չիրականացնի, կանգ չի առնի: «Այսօր կարևոր է ոչ թե արագ զինադադար հաստատել, այլ հասցնելը հակահարված տալ»,- նշեց քաղաքագետը՝ հավելելով, որ այլապես հակառակորդը ճիշտ եզրակացության չի գա:
Ստեփան Գրիգորյանը նաև ընդգծեց, որ Ալիևը պատերազմը երկար շարունակել չի կարող. «Ալիևը հոգեվարքի մեջ է»:
Մանրամասն՝ տեսանյութում: