2011 թ. հուլիսին հունիսի համեմատ պարենային ապրանքների շուկայում արձանագրված գների ընդհանուր մակարդակի 5.9% նվազումը հիմնականում բանջարեղենի, այդ թվում՝ կարտոֆիլի, ինչպես նաև մրգի ապրանքախմբերի 34.9% և 23.3% գնանկման արդյունք է: Ըստ Ազգային վիճակագրական ծառայության՝ այսօր հրապարակած ցուցանիշների, դիտարկվող պարենային 13 ապրանքախմբից 8-ում նշված ժամանակահատվածում արձանագրվել է 34.9-0.1% գնանկում, 4-ում` 0.1-2.9% գնաճ, իսկ մեկում գների մակարդակը նախորդ ամսվա համեմատ մնացել է անփոփոխ:
Բանջարեղենի ապրանքախմբում 2011 թ. հուլիսին 2010 թ. հուլիսի համեմատ արձանագրվել է 16.5%, իսկ 2011 թ. հունիսի համեմատ` 34.9% գնանկում: Մրգի ապրանքախմբում տարեկան կտրվածքով արձանագրվել է 3.3% գնաճ, իսկ ամսական կտրվածքով` 23.3% գնանկում:
2011 թ. հուլիսին հունիսի համեմատ մրգի, բանջարեղենի ( այդ թվում՝ կարտոֆիլի) ապրանքախմբերի ընդհանուր գնանկումը կազմել է 30.7%: Վերոհիշյալ ապրանքախմբերը, սպառողական զամբյուղում ունենալով 9.92 տեսակարար կշիռ, նշված ժամանակահատվածում նպաստել են սպառողական գների ընդհանուր մակարդակի նվազմանը 3.04%-ային կետով:
Տարեկան կտրվածքով թանկացել է նաև կաթնամթերքը՝ 20.5%-ով, իսկ ամսական կտրվածքով դիտվել է 1.4% գնանկում: Վերջինս հիմնականում պայմանավորվել է «Չանախ» և «Լոռի» տեսակի պանիրների`համապատասխանաբար 5.3% և 4.9% գնանկումով:
Անցած տարի համաշխարհային շուկայում հացահատիկի դեֆիցիտի արդյունքում կտրուկ թանկացումները հանգեցրին հացամթերքի ապրանքախմբում 16.3% տարեկան գնաճի, սակայն այս տարի սպասվող առատ բերքի պայմաններում հուլիսին հունիսի համեմատ գնանկումն ընդամենը 0.6% է:
ԱՎԾ տվյալներով՝ 2011 թ. հուլիսին հունիսի համեմատ հանրապետությունում գրանցվել է ձվի, ձկնամթերքի, շաքարավազի, ոչ ոգելից խմիչքի 1.1-0.1% գնանկում, իսկ կենդանական և բուսական յուղերի ապրանքախմբում գների մակարդակը նախորդ ամսվա համեմատ մնացել է անփոփոխ:
Թե՛ տարեկան, և թե՛ ամսական կտրվածքով թանակցել է մսամթերքը, համապատասխանաբար՝ 12.0% և 2.9%: 2011 թ. հուլիսին հունիսի համեմատ հանրապետությունում 0.1-0.9%-ով թանկացել են նաև մթերքը, ոգելից խմիչքը և ծխախոտը, հրուշակեղենը, սուրճը, թեյը, կակաոն:
