Վրաստանի նախկին նախագահ Միխեիլ Սահակաշվիլին ընտրողներին խոստացել է, որ հոկտեմբերին կայանալիք խորհրդարանական ընտրություններում իր «Միացյալ ազգային շարժում» կուսակցության հաղթանակի և վարչապետի պաշտոնը ստանձնելու դեպքում, նա առճակատման չի գնա Ռուսաստանի հետ, հաղորդում է «Ինտերֆաքս»-ը:
Սահակաշվիլիի խոսքով, նա կլուծի ներքին խնդիրները, այդ թվում՝ երկարաժամկետ հեռանկարում: Մասնավորապես՝ ներքին տարածքների խնդիրը:
«Հիմա անհրաժեշտ է երկիրը դուրս բերել ճահճից, այլ ոչ թե առճակատման գնալ ինչ որ մեկի հետ»,- նշել է նախկին նախագահը:
Նա նաև հայտարարել է, որ վերջին տարիներին շատ բաներ է վերագնահատել: «Ես այն Միշան չեմ, ինչպիսին եղել եմ»,- ասել է Սահակաշվիլին՝ հավելելով, որ պատրաստ է գլխավորել Վրաստանի կառավարությունը ոչ ավելի, քան երկու տարի ժամկետով, ապա վերադառնալ Ուկրաինա:
«Ես արդեն մտել եմ պատմության մեջ, բայց Վրաստանում շատ բան պետք է փոխել՝ երկիրը չկորցնելու համար»,- եզրափակել է քաղաքական գործիչը: