Առաջիկա օրերին Երևանում օդի ջերմաստիճանը կհասնի մինչև 40 աստիճանի, ինչը կարող է բացասաբար անդրադառնալ տարեցների, ճնշման տատանումներ ունեցող ու սրտանոթային հիվանդություններով տառապող մարդկանց ինքնազգացողության վրա: Այս մասին «Առաջին լրատվականի» հետ զրույցում ասաց բժիշկ, «Շտապօգնություն» ՓԲԸ-ի տնօրեն Թագուհի Ստեփանյանը:
Նա վերջիններիս խորհուրդ տվեց հնարավորության սահմաններում ժ. 12:00-17:00-ի սահմաններում դուրս չգալ տանից՝ արևի ուղիղ ճառագայթներից պաշտպանվելու նպատակով կամ գոնե աշխատել գտնվել ստվերոտ վայրերում, կրել գլխարկ: «Անհրաժեշտ է սովորական քանակությունից (1-1.5 լիտր) շատ հեղուկներ, օրինակ՝ թան օգտագործել»,- ասաց նա՝ նշելով, որ սրտանոթային անբավարարությամբ տառապողները պետք է զգույշ լինեն հեղուկներ օգտագործելիս:
Շոգ եղանակին թունավորումներից խուսափելու նպատակով Թ.Ստեփանյանը խորհուրդ տվեց հնարավորինս քիչ օգտագործել մսեղեն, ուշադիր ստուգել գնված սննդի ժամկետայնությունը: Նա խորհուրդ տվեց ավելի շատ օգտագործել մաքուր սնունդ՝ մրգեր, բանջարեղեն:
