ՀՀ փոխվարչապետ, տարածքային կառավարման նախարար Արմեն Գևորգյանն այսօր մասնակցեց «Արի տուն» 2011 թ. ծրագրի չորրորդ փուլի փակման արարողությանը:
«Արի տուն» ծրագիրն իրականացվում է 2009 թվականից և նպատակ ունի սփյուռքահայ երիտասարդներին ճանաչելի դարձնել Հայաստանը, նրանց մեջ արմատավորել ազգային արժեքային համակարգ, ծանոթացնել հայ ընտանիքների կենցաղին: Ծրագրին մասնակից երիտասարդներն ապրում են Երևանից և հանրապետության տարբեր մարզերից ընտրված հյուրընկալ ընտանիքներում:
Փոխվարչապետը մասնակցեց 4-րդ փուլի ավարտին նվիրված տոնական արարողությանը, զրուցեց մասնակիցների հետ: Ա. Գևորգյանը կարևորեց նման միջոցառումների անցկացումը՝ նշելով, որ դրանք հնարավորություն են տալիս ավելի լավ ճանաչել իրենց հայրենիքը, նպաստում են Հայաստան-Սփյուռք հարաբերությունների ամրապնդմանը, և Սփյուռքում հայապահպանությանն ուղղված կարևոր գործոն են հանդիսանում:
«Արի տուն» 2011 թ. ծրագիրը նախատեսում է Հայաստան բերել մինչև 800 երիտասարդի: Այս տարվա ծրագրով Հայաստան եկած երիտասարդները բնակվել են Արարատի, Արմավիրի, Կոտայքի, Արագածոտնի հյուրընկալ ընտանիքներում և Երևանում:
Ծրագրի այս փուլին մասնակցել է 173 երիտասարդ՝ աշխարհի 15 երկրներից:
«Արի տուն» 2011 թ. ծրագրի չորրորդ փուլի փակման արարողության ժամանակ սփյուռքահայ և հյուրընկալ ընտանիքների երիտասարդները հանդես եկան երաժշտական կատարումներով:
