Հունաստանի արտգործնախարարությունը մեկնաբանել է Թուրքիայի փոխնախագահ Ֆուաթ Օքթայի այն հայտարարությունը, որ Աթենքի տարածքային ջրերը 12 մղոն երկարացնելու փորձը կարող է ռազմական բախում առաջացնել:
«Թուրքիայի աննախադեպ ընկալումը, որ ինքը կարող է սպառնալ հարևան երկրներին ուժի գործադրմամբ, երբ նրանք կիրառում են իրենց օրինական իրավունքները, հակասում է ժամանակակից քաղաքական մշակույթին և միջազգային իրավունքի հիմնարար դրույթներին: Մենք Թուրքիային կոչ ենք անում գիտակցել, որ միջազգային իրավունքը և այն արժեքները, որոնց վրա կառուցված է ժամանակակից միջազգային կարգը , պարտադիր են աշխարհի բոլոր երկրների համար: Դրանք ընտրովի չեն կիրառվում, և միջազգային հանրությունը պարտավոր է պաշտպանել դրանք, քանի որ դրանց խախտումը վկայում է առավելագույն ռիսկի մասին», – ասված է հաղորդագրության մեջ:
Աթենքը հիշեցրել է, որ Թուրքիան պարտավոր է կատարել ՄԱԿ-ի կանոնադրության երկրորդ հոդվածը, որում ասվում է, որ միջազգային կազմակերպության բոլոր անդամները պետք է զերծ մնան սպառնալիքից կամ ուժի կիրառումից:
«Ամեն դեպքում, մենք նրան հիշեցնում ենք, որ Հունաստանի ինքնիշխանության կիրարկումը կախված չէ թուրքական վետոյի որևէ ձևաչափից», – եզրափակել է Հունաստանի ԱԳՆ-ն: