Ադրբեջանական APA լրատվական գործակալությանը տված հարցազրույցի ժամանակ Վաշինգթոնի Կենտրոնական Ասիայի ու Կովկասի ինստիտուտի աշխատակից Սամուել Լուսակն անդրադարձել է Nabucco-ի նախագծին և ղարաբաղյան հակամարտության կարգավորման գործընթացում ԵՄ-ի ներգրավվածությանը.
«Երկար ժամանակ քննարկվել է Հարավային Կովկասի գործընթացներում ԵՄ-ի ներգրավվածության հարցը։ Ակնհայտ է, որ ԵՄ-ը պետք է ավելի շատ գործ անի տվյալ ոլորտում։ Առաջին հերթին Հարավային Կովկասի երկրները պետք է ավելի ակտիվորեն ցուցադրեն Եվրոպային ինտեգրվելու իրենց ցանկությունը։
Ադրբեջանը պարտավորվել է «Հարավային միջանցք» նախագծի միջոցով 10 միլիարդ խորանարդ մետր գազ հատկացնել Եվրոպային։ Nabucco-ն այնպիսի նախագիծ է, որին ավելի շատ աջակցում է ԵՄ-ի հանձնաժողովը։
Սակայն այդ նախագիծն Ադրբեջանում ու Թուրքիայում չի արժանանում բավականաչափ քաղաքական աջակցության։ Ներկայումս Nabucco-ն այդքան էլ չի համապատասխանում Ադրբեջանի սպասումներին։ Դա թանկարժեք նախագիծ է, և Ադրբեջանը չի ցանկանում մեծ գումարներ վատնել դրա վրա։
Բացի այդ, Մինսկի խմբի համանախագահությունը պետք է Ֆրանսիայից անցնի ԵՄ-ին։ Ընդհանուր առմամբ, միայն ԵՄ-ը կարող է անկեղծ միջնորդ հանդիսանալ Ադրբեջանի ու Հայաստանի միջև։ Ներկայումս, երբ ղարաբաղյան հակամարտության կարգավորումը մտել է փակուղի, հուսով եմ, որ ԵՄ-ը հնարավորություն կգտնի ավելի կարևոր դեր խաղալու համար»։