«Լաուրա» սաստիկ փոթորիկն օգոստոսի 27-ին մոլեգնել է Լուիզիանայի նահանգի ծովեզերքին: Այդ մասին հաղորդել է ԱՄՆ-ի Փոթորիկների դիտարկման ազգային կենտրոնը:
Կենտրոնի տվյալներով՝ Լուիզիանայում սկսվել են սաստիկ տեղատարափ անձրևներ, քամի և մրրկային մակընթացություն:
Ցիկլոնը շարունակում է շարժվել հյուսիսային ուղղությամբ՝ ժամում 24 կիլոմետր արագությամբ: Ցիկլոնի սահմաններում քամու արագությունը գերազանցում է վայրկյանում 66 մետրը:
Օդերևութաբանները նախազգուշացրել էին չորրորդ կատեգորիայի փոթորկից (ըստ Սաֆիր – Սիմփսոնի սանդղակի) «պոտենցիալ աղետալի վնասի» մասին: Փոթորկի նախազգուշացում է հայտարարված Միսիսիպիի գետաբերանի և երկու նահանգների առափնյա շրջանների բնակիչների համար:
Տեխասի և Լուիզիանայի իշխանություններն ավելի վաղ մոտավորապես 1,5 միլիոն տեղացի բնակիչների կարգադրել կամ խորհուրդ են տվել տարահանվել «Լաուրայի» մոտենալու պատճառով: Փոթորիկների սեզոնը սովորաբար Ատլանտիկայում շարունակվում է կես տարի՝ հունիսի սկզբից մինչև նոյեմբերի վերջը:
Մթնոլորտային երևույթը դասակարգվում է որպես արևադարձային մրրիկ և ստանում Է սեփական անուն, եթե քամու արագությունը դրա սահմաններում հասնում է վայրկայանում շուրջ 17,5 մետրի: Վայրկյանում 33 մետր և ավելի արագության դեպքում մրրիկը դառնում Է փոթորիկ:
