ԱՄՆ-ի նախագահ Դոնալդ Թրամփն օգոստոսի 25-ի ուշ երեկոյան մասնակցել է նոր ամերիկացի քաղաքացիների հպատակագրման արարարողությանը, որը կայացել է Սպիտակ տանը Հանրապետական կուսակցության ազգային նախընտրական համագումարի շրջանակում։
Քաղաքացիության ընդունման այդ հանդիսավոր արարողութունը, որը վաղօրոք չէր ծանուցվել ո՛չ ԱՄՆ-ի վարչակազմի, ո՛չ Էլ Հանրապետական կուսակցության Ազգային կոմիտեի կողմից, անցկացրել է ներքին անվտանգության նախարարի պաշտոնակատար Չեդ Վուլֆը:
Թրամփը նույն օրն ավելի վաղ հայտարարել էր Վուլֆի թեկնածությունը ներքին անվտանգության նախարարության ղեկավարի պաշտոնում առաջադրելու և այն ԱՄՆ-ի Կոնգրեսի Սենատ հաստատման ուղարկելու մտադրության մասին: Տեղական ժամանակով ժամը 22-ից (Երևանի ժամանակով օգոստոսի 26-ի 06:00-ից) հետո Թրամփի ներկայությամբ ամերիկյան քաղաքացիություն է ստացել հինգ մարդ. Բոլիվիայից, Լիբանանից, Հնդկաստանից, Սուդանից և Գանայից սերածներ, ովքեր վերջին տարիներին մշտապես բնակվել են ԱՄՆ-ում:
Արարարողությունն ուղիղ եթերով հեռարձակել են ԱՄՆ-ի մի քանի՝ նորությունների հեռուստաալիքներ: Այն նաև ցուցադրել են համագումարի պաշտոնական ինտերնետ-կայքում: Թրամփը շնորհավորել է ԱՄՆ-ի նորաթուխ քաղաքացիներին՝ ասելով, որ ուրախ է ողջունել «նոր անդամներին» «հիանալի ամերիկյան ընտանիքում»:
«ԻՆձ համար պատիվ է լինել ձեր նախագահը»,- ասել է Թրամփը, ում Հանրապետական կուսակցությունն օգոստոի 24-ին պաշտոնապես հաստատեց որպես իր թեկնածու այժմյան ընտրություններում: ԱՄՆ-ում հերթական նախագահական ընտրությունները կկայանան նոյեմբերի 3-ին: Թրամփի մրցակիցը կլինի Ջոզեֆ Բայդենը, որը ներկայացնում է ԱՄՆ-ի Դեմոկրատական կուսակցությունը:
