Հայաստանի վարչապետ Նիկոլ Փաշինյանի որոշումով՝ առողջապահության նախարար Արսեն Թորոսյանը օգոստոսի 31-ից մինչև սեպտեմբերի 18-ը գտնվելու է իրեն հասանելիք արձակուրդում: Այդ որոշումը կդասվեր շատ սովորականների շարքին, եթե այն չլիներ մամուլում Թորոսյանի հրաժարականի վերաբերյալ ամենատարբեր հրապարակումների բուռն ֆոնին: Հրապարակումներն էլ ուղեկցվել են սոցիալական ցանցերից նախարարի «անհետացմանը» զուգահեռ: Եթե դրան հավելենք նաև այն, որ առողջապահության նախարարությունը և ընդհանրապես կառավարությունը առանձնապես աշխույժ չէ հրաժարականի մասին տեղեկությունները հստակ հերքելու հարցում, ապա ինտրիգը դառնում է առավել քան շոշափելի: Միաժամանակ, ԱԱԾ-ն իհարկե հերքել է տեղեկությունը, թե Թորոսյանը կասկածվում է կորոնավիրուսի դեմ պայքարի համար նախատեսված միջոցների յուրացման կոռուպցիոն ռիսկերում և հրավիրվել է ԱԱԾ: Ազգային անվտանգության ծառայությունը հայտնել է, թե նախարարը չի կանչվել ԱԱԾ, և դրա կարիքը չկա էլ: Այդ թեմայով հրապարակումներում նշվել է, թե պարետատունը առողջապահության նախարարությունից մանրամասն հաշվետվություն է պահանջել փողերի ծախսման հարցում:
Ի՞նչ է հասունանում առողջապահության նախարարի շուրջ, և ինչո՞ւ է կառավարող մեծամասնությունն այդքան պասիվ հասունացող ինտրիգը արագորեն ցրելու հարցում: Նախօրեին տեղի է ունեցել «Իմ քայլը» խմբակցության հանդիպում վարչապետ Փաշինյանի հետ, և դրա առնչությամբ մամուլի հրապարակումներում չկա որևէ հղում կամ արտահոսք առողջապահության նախարարի թեմային: Այսինքն՝ փաստացի չի օգտագործվել հրաժարականի մասին տեղեկությունները հերքելու բավականին հարմար և պաշտոնական առիթ: Դա այն դեպքում, երբ պատգամավորները թերևս պետք է որ վարչապետից հետաքրքրվեին, թե որքանով են հավաստի մամուլում շրջանառվող տեղեկությունները, և ստանային իրենց պատասխանը: Այն, որ Արսեն Թորոսյանը զուտ օբյեկտիվորեն ունենալու էր արձակուրդի խիստ անհրաժեշտություն, անկասկած է, հաշվի առնելով այն գերծանրաբեռնվածությունը, որով աշխատել է նախարարն ու նախարարությունը կորոնավիրուսի ֆոնին: Միևնույն ժամանակ, Արսեն Թորոսյանի հանդեպ ահռելի է եղել բարոյական ճնշումը, երբ նա ենթարկվում է ամենատարբեր բնույթի քննադատության՝ հիմնավոր ընդդիմախոսությունից մինչև ծայրահեղ զազրախոսություն և զրպարտություններ: Դա, անկասկած, բազմապատկում է բեռը մարդու համար, և այդ իմաստով հնարավոր է հասկանալ նախարարի վիճակը:
Մյուս կողմից, սակայն, կարող է առաջանալ նաև մեկ այլ հարց՝ որքանո՞վ կարող է այսպես ասած բարոյական լինել նախարարի մոտ երեք շաբաթ տևող արձակուրդը այն հանգամանքի հետ, որ բուժանձնակազմի մի զգալի մասն, այդուհանդերձ, դեռ շարունակում է պայքարը ավելի քան 5000 վարակակիրներին առողջացնելու համար: Անշուշտ, պատկերը առնվազն կիսով չափ ներկայումս թեթևացել է, այդուհանդերձ, այսպես ասած նավապետը վերջինն է լքում «խորտակվող նավը»: Տվյալ դեպքում, իհարկե, խոսքը բարեբախտաբար խորտակման մասին չէ, այլ իսկապես կորոնավիրուսի պատկերի աստիճանական չեզոքացման, այդուհանդերձ, խոսքը պայքարի մասին է, փրկության շարունակվող պայքարի, և ըստ էության կա «նավապետի» վերջինը լքելու համեմատության որոշակի հիմք: Եվ դա ևս լրացուցիչ ինտրիգ է հաղորդում առողջապահության նախարարի շուրջ ստեղծված վիճակին և արձակուրդին: Ո՞վ և ե՞րբ է ցրելու այդ ինտրիգը, եթե ոչ վերջնականապես, ապա գոնե այս փուլում, որովհետև Արսեն Թորոսյանն այդպիսի տեղեկատվա-քարոզչական հանգույցներում պարբերաբար հայտնվող պաշտոնյաներից է:
Լուսանկարը՝ «Ֆոտոլուր»-ի