Իսպանիայի մի շարք շրջաններ, ներառյալ Մադրիդն ու Գրան Կանարիան, կրկին գտնվում են կամավոր մեկուսացման ռեժիմում, քանի որ ողջ երկրով մեկ շարունակվում են կորոնավիրուսի բռնկումները: Այս մասին հայտնում է The Sun-ը:
Իսպանիայի իշխանությունները դեռևս բացառել են համազգային պարտադիր մեկուսացման վերադառնալու հավանականությունը, սակայն քաղաքացիներին կոչ են անում հնարավորինս չլքել իրենց տները:
Գրան Կանարիայի Վալեսեկո տուրիստական հանգստավայրում կորոնավիրուսի միայն երեք դրական դեպք է գրանցվել, սակայն տեղի քաղաքապետը զգուշացրել է, որ չի ցանկանում ռիսկի դիմել, հաշվի առնելով կղզու այլ վայրերում մեծ քանակությամբ դրական արդյունքները: Նա խնդրել է 4000 բնակչի կամավոր ինքնամեկուսացվել և հնարավորության դեպքում չլքել մեկուսացման վայրը՝ կորոնավիրուսի բռնկումներից խուսափելու համար։
Կանարյան կղզիներում 23 օրվա ընթացքում եռապատկվել է հիվանդության դեպքերի թիվը: Օգոստոսի 23-ին Կանարյան կղզիներում կորոնավիրուսի դրական դեպքերի թիվը հասել է 4853-ի։ Այնտեղ կորոնավիրուսի հետևանքով մահացել է 167 մարդ:
Իսպանիայում հաստատվել է կորոնավիրուսի 420 հազար 809 դեպք: Երկրում վիրուսի հետևանքով մահացել է 28 հազար 872 մարդ:
