Ալեքսեյ Նավալնին թունավորվել է, նրա անալիզներում հայտնաբերվել է խոլինէսթերազի ինհիբիտորների խմբի տոքսին, հայտարարել են Բեռլինի «Շարիտե» կլինիկայի բժիշկները: Նման նյութերի դասին են պատկանում ռազմական թույները, որոնց ազդեցությունը կարող է երկարաժամկետ հետևանքներ ունենալ մարդու վրա: Նման թույների թվում է, օրինակ, Նովիչոկը, որով Մեծ Բրիտանիայում թունավորել էին ՊՀՎ նախկին աշխատակից Սերգեյ Սկրիպալին:
Գերմանիայի կանցլեր Անգելա Մերկելն արդեն պահանջել է գտնել հանցագործներին:
Օգոստոսի 20-ից կոմայի մեջ գտնվող ընդդիմադիր գործիչ Ալեքսեյ Նավալնիի հետազոտության առաջին արդյունքները Բեռլինի «Շերիտե» կլինիկան հրապարակել է երկուշաբթի, օգոստոսի 24-ին՝ նրա Գերմանիա տեղափոխվելուց երկու օր անց։ Հիվանդանոցի կայքում արված հայտարության մեջ նշվում է, որ Նավալնիին թունավորել են։
Օմսկի հիվանդանոցի բժիշկները, որտեղ Նավալնին Մոսկվա թռչող ինքնաթիռի մեջ գիտակցությունը կորցնելուց հետո անցկացրեց առաջին երկու օրերը, հրաժարվել են այս ախտորոշումից, իսկ Քննչական կոմիտեն հրաժարվել է համապատասխան հոդվածով քրեական գործ հարուցել: