Էրդողանի ամենաուժեղ մրցակիցները Ստամբուլի և Անկարայի ընդդիմադիր քաղաքապետերն են․ սոցհարցում

Թուրքական «Optimar» (Օպտիմար) սոցիոլոգիական ընկերությունը հարցում է անցկացրել պարզելու, թե նախագահական ընտրություններ անցկացնելու դեպքում որ քաղաքական գործիչը հաղթանակի ավելի շատ շանսեր կունենար։

Հարցումն իրականացվել է Թուրքիայի 26 նահանգում, որին մասնակցել է 2121 մարդ։

«Եթե առաջիկա կիրակի նախագահական ընտրություններ լինեն, ու՞մ օգտին կքվեարկեք» հարցի պատասխանները դասակարգվել են հետևյալ կերպ․

• Թուրքիայի ներկայիս նախագահ Ռեջեփ Թայիփ Էրդողան- 40,1%

• Ստամբուլի ընդդիմադիր քաղաքապետ Էքրեմ Իմամօղլու- 36,8%

• Անկարայի ընդդիմադիր քաղաքապետ Մանսուր Յավաշ- 36,7%

• Նախագահի նախկին թեկնածու Մուհարրեմ Ինջե (2018թ․)- 33,5%

Բավականին մեծ տոկոս են կազմում չկողմնորոշվածները հատկապես երբ պետք է ընտրություն կատարել Էրդողանի ու Իմամօղլուի միջև։ Այս դեպքում չկողմնորոշվածների քանակը հասնում է 18,1%-ի։