ՀՀ երրորդ նախագահ Սերժ Սարգսյանի մամուլի ասուլիսը, որը նրա պաշտոնաթողությունից հետո առաջինն էր, քննարկումների առիթ է հանդիսացել. այսօր էլ քիչ չէին այդ ասուլիսի վերաբերյալ հրապարակումները: Դա հավանաբար բացատրվում է նաև նրանով, որ խոսքը Հայաստանի ամենաողբերգական դրվագներից մեկի՝ Ապրիլյան պատերազմի մասին է:
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ Արմեն Հովհաննիսյանը և Գերագույն խորհրդի նախկին պատգամավոր Ազատ Արշակյանը:
Արմեն Հովհաննիսյանի դիտարկմամբ՝ ԱԺ Ապրիլյան պատերազմի հանգամանքներն ուսումնասիրող հանձնաժողովի ստեղծումը ակտուալացրեց խնդիրը. «Ս. Սարգսյանը և նրա շրջանակը բոլոր մեղադրանքներից հիվանադագինը արձագանքում են Ապրիլյանի հետ կապված մեղադրանքին, որովհետև այդ մեղադրանքը շատ հեռուն գնացող է ոչ միայն Քրեական օրենսգրքի կամ պարսավանքի տեսակետից, այլ նաև նրանով, որ հայ ժողովուրդն իր պատմությունը գրելիս կտրուկ է՝ «սև» ես կամ «սպիտակ», եթե դարձար «վասակ», որպես «վասակ» էլ կմնաս պատմության «սևի» մեջ: Այդ հարցը իրենց համար շատ ցավոտ է և ասուլիսը, կարծում եմ, պայմանավորված էր դրանով»,- նշեց Արմեն Հովհաննիսյանը:
«Հայոց բանակում յուրաքանչյուր զինծառայողի կյանքը շատ թանկ է: Ապրիլյան պատերազմի ժամանակ զոհված և վիրավորված յուրաքանչյուր զինծառայողի գործով պարտավոր էին քրեական գործ հարուցել և մեղավորներին հայտանբերել»,- նշեց Ազատ Արշակյանը՝ հավելելով, որ անհրաժեշտ է պատժել նրան, ով պատասխանատու է այդ հարյուրից ավելի զոհերի համար:
«Եթե Գլխավոր գերագույն հրամանատարը չի պատժվում, ապա ո՞վ է պատասխանատուն. Սերժ Սարգսյանը պարտավոր էր Ապրիլյանից հետո քրեական գործ հարուցել»,- նշեց Գերագույն խորհրդի նախկին պատգամավորը:
Ասուլիսի ժամանակ Սերժ Սարգսյանը հայտարարել է, որ Ապրիլյան պատերազմի մասին նախապես տեղյակ չեն եղել, հետախուզությունն է վրիպել: Անդրադառնալով այս դիտարկմանը՝ Ազատ Արշակյանն ընդգծեց. «Հետախուզությունը չի վրիպել, ինքն է վրիպել՝ իր նշանակած կադրերն են սխալվել. այդտեղից պետք է սկսեր: Պատասխանատուն նախևառաջ պետք է լինի Գերագույն գլխավոր հրամանատարը… Սա կանխորոշող, աղմուկ առաջացնող, շեղող, ինքնապաշտպանական ակցիա էր»:
Արմեն Հովհաննիսյանն ընդգծեց, որ անցյալի սխալները չպետք է կրկնել. «Սա շատ կարևոր է. մեր ազգը պատմական դասեր պետք է քաղի տեղի ունեցածից և այլ կերպ կազմակերպի իր կյանքը»:
Ազատ Արշակյանն ընդգծեց, որ նախկիններին պետք է քաղաքական գնահատական տալ. «ՀՀԿ-ին և իր դաշնակիցներին, որոնք վճիռ կայացնելու իրավունք ունեին, պետք է քաղաքական գնահատական տրվի մեր պատմության այդ դրվագի համար»:
Մանրամասն՝ տեսանյութում:
