Մեր երկրում չկա այնպիսի քաղաքական իրավիճակ, որ արտահերթ նախագահական ընտրություններ անցկացվեն: Այսօր լրագրողների հետ հանդիպման ժամանակ նման տեսակետ հայտնեց ԱԺ պատգամավոր, իշխանության կոալիցիայի անդամ Գագիկ Մինասյանը՝ շարունակելով, որ իշխանական կոալիցիան փորձելու է հասկանալ նման հայտարարության պատճառը:
«Մենք կփորձենք քննարկել և հասկանալ՝ մեր գործընկերներն ինչո՞ւ են հենց այս հարցը բարձրացնում, միասին կգանք հետաքրքիր հանգուցալուծման, որը ձեռնտու կլինի երկու կողմերին, սակայն հեռու եմ այն մտքից, որ մեր բոլոր առաջարկները կընդունվեն»,- մեկնաբանեց իշխանական կոալիցիայի ներկայացուցիչը՝ ընդգծելով, որ ստեղծվել են առավելագույն պայմանները երկու կողմերի առաջարկները քննարկման առարկա դարձնելու համար:
Լրագրողների այն հարցին, թե երբ երկխոսությունը կհասնի իր եզրափակիչ փուլին, պատասխանեց, որ այն կախված է նրանից, թե կողմերն ինչպես կքննարկեն օրակարգում դրված երկու հարցերը:
«Այս երկխոսությունն նպատակ ունի ստեղծված ներուժը ոչ թե տանել առճակատման, այլ օգտագործել ի նպաստ երկրի բարօրության: Սա հեշտ չէ, քանի որ նման նախադեպ հետխորհրդային երկրներում դեռևս չի եղել»,- նշեց Գ. Մինասյանը:
Անդրադառնալով օգոստոսի 4-ին կայանալիք ՀԱԿ-իշխանական կոալիցիա հանդիպմանը՝ նա նշեց, որ քննարկվելու են աշխատանքային խնդիրները, մասնավորապես՝ թե ինչպես են երկու բարձրացված հարցերը քննարկվելու ապագայում: