«Այն, որ այսօր Սերժ Սարգսյանն ազատության մեջ է, ասուլիս է տալիս, ապրիլյան պատերազմը համարում է հաղթանակ, դա բացառապես ներկայիս իշխանության մեղավորությունն է»,- «Առաջին լրատվական»-ի հետ զրույցում ասաց Արցախի «Միացյալ Հայաստան» կուսակցության նախագահ Վահան Բադասյանը՝ անդրադառնալով այսօր Սերժ Սարգսյանի ասուլիսին և այդ ասուլիսում հնչեցրած որոշ գնահատականներին։
Նշենք, որ ասուլիսի ժամանակ, խոսելով ապրիլյան քառօրյա պատերազմի մասին, Սերժ Սարգսյանն ասաց. «Ես ձեզ առանց ավելորդ սեթևեթության կարող եմ ասել, որ ես չեմ տեսնում անձամբ իմ կողմից կամ Զինված ուժերի կողմից այնպիսի սխալ, որի մասին հիմա արժե խոսել։ Մենք ապրիլյան պատերազմում հաղթել ենք, և դրա չափման միավորը Ադրբեջանի պլանների ձախողումն է։ Չափման միավորը այն է, որ հակառակորդ երկրի նախագահը հրապարակավ հայտարարում է, որ իրեն ստիպում են ճանաչել ԼՀՂ անկախությունը»։
«Լավ է անում Սերժ Սարգսյանը, որ ապրիլյանը համարում է հաղթանակ, ինքը դա անում է, քանի որ նոր իշխանությունները լեգիտիմացրին Սերժ Սարգսյանի՝ որպես գերագույն գլխավոր հրամանատարի կողմից իրականացված խայտառակությունը։ Եվ այդ լեգիտիմացումը եղավ ապրիլյանի դեպքերը քննող հանձնաժողով ստեղծելու միջոցով։ Այդ հանձնաժողովը մատը մատին չտվեց, մի բան էլ արդարացրեց Սերժ Սարգսյանին»,- ասաց Բադասյանը։
Մեր դիտարկմանը՝ քննիչ հանձնաժողովը դեռ չի հրապարակել իր վերջնական եզրակացությունը, և փորձագիտական շրջանակների գնահատմամբ՝ Սերժ Սարգսյանը հենց այդ զեկույցից զգուշանալով է ասուլիս հրավիրել, Բադասյանը պատասխանեց. «Հանձնաժողովը կամ չի ուզում լիարժեք բացահայտումներ անել, կամ չի կարող։ Կամ՝ երկուսը միասին։ Ասում եք՝ դեռ չի հրապարակվել զեկույցը։ Իսկ ինչքան ժամանակ է պետք դա հրապարակելու համար, մանավանդ որ աշխատանքները վաղուց ավարտվել են։ Ինչու են հապաղում։ Բայց արդեն իսկ սպասելի է, թե ինչ են հրապարակելու։ Ես հարավային ուղղությամբ եղել եմ պատասխանատու, բայց միայն իմ շրջապատից որևէ մեկը չի հարցաքննվել այդ հանձնաժողովում, թե ով ինչ գործողություն է կատարել, ինչպես է եղել, ով է եղել մեղավորը, որ մեր տղաների դիակները մնացել են հակառակորդի ձեռքում, որ մեր դիրքերը մնացել են իրենց ձեռքում։ Ես չեմ կարող ծավալվել՝ ելնելով շատ իրողություններից, պետական գաղտնիք պարունակող բաներ ասել։ Միայն լավ է, որ դրանից հետո շատ հարցեր շտկվել են, որոշ հրամանատարներ աշխատանքից ազատվել են, բայց դա բավարար չէ։ Դրան պետք է հաջորդեր պատասխանատվությունը, որը չեղավ»։
Բադասյանի խոսքով՝ ապրիլյանի ժամանակ հրամանատարները իրենց տեղում չեն եղել, չեն կարողացել և չեն իմացել՝ ինչ քայլեր պետք է ձեռնարկեն, ոչ մի բան չեն ձեռնարկել։ Անգործության է մատնված եղել նաև Գլխավոր շտաբի պետը, իսկ գերագույն գլխավոր հրամանատարը Ամերիկայում էր, բայց կարող էր ընդամենը մեկ հրաման տալ՝ հետ վերցնել դիրքերը: «Բայց նա նման հրաման չի տվել։ Հրաման չի տվել նաև հաջորդ օրերին։ Եվ տպավորություն է, որ այդ դիրքերը պետք է հանձնվեին, իսկ տղաները որպես մատաղացու պետք է զոհվեին։ Այս տպավորությունն է ձևավորվում։ Ես չեմ ասում, որ պայմանավորված պատերազմ է եղել, բայց նրանց բոլոր գործողությունները մարդկանց բերում են այդ եզրահանգման։ Սերժ Սարգսյանը խոսում է 80-ականների զենքից։ Այո, որևէ առաջընթաց չի եղել այդ ժամանակ մեր զինված ուժերում։ Իսկ այդ տարիներին իրենց ջիպերը 2016 թվականի արտադրության էին, գերժամանակակից էին, որոնցից յուրաքանչյուրի արժեքը մեկ տանկի արժեք էր։ Սրա մասին կա՞ հանձնաժողովի զեկույցում»,- ընդգծեց Բադասյանը՝ ավելացնելով, որ քննիչ հանձնաժողովի զեկույցը իրեն չի էլ հետաքրքրում։ Իրեն միայն մեկ հարց է հետաքրքրում, թե ինչու քրեական գործեր չեն հաջորդել ապրիլյան պատերազմին:
«Իսկ եթե քրեական գործեր չկան, ապա Սերժ Սարգսյանը անմակարդակ, անբովանդակ, ստերով լիքը ասուլիս կհրավիրի, դրանից ուրախ, գոհ կմնա, քանի որ ինքը գիտի, որ իր արածները իրոք որպես հաղթանակ են ներկայացվել։ Այս ամենի մեղավորը, կրկնում եմ, գործող իշխանությունն է»,- եզրափակեց Վահան Բադասյանը։
