«Առաջին լրատվական»-ը սկսում է հաղորդումների շարք՝ նվիրված Հայաստանի Անկախության տոնին։ «Առաջին լրատվական»-ի հյուրն է Գերագույն խորհրդի պատգամավոր Ազատ Արշակյանը։
«30 տարի առաջ, երբ Հայաստանը հռչակվեց անկախ պետություն, մենք չգիտեինք, թե ինչ տագնապներ են լինելու, ինչքան կտևի դա։ Իհարկե, մենք ուզում էինք, որ դա հավերժ լինի և այլևս նման հռչակում երբեք չլինի՝ մի անգամ հռչակեցինք անկախ, ու վերջ, պետք է մնանք անկախ»,- «Առաջին լրատվական»-ի հետ զրույցում ասաց Ազատ Արշակյանը։
Հիմա ի՞նչ է պահպանվել այդ ոգևորությունից․ «Առաջին լրատվական»-ի հարցին Ազատ Արշակյանը պատասխանեց․ «Շատ բան է փոխվել։ Պահպանվել է հայ ժողովրդի ոգին։ Հիմա մի քիչ տրանսֆորմացիա է արվել, օրինակ՝ այսօր բանակի գոյությունը հանում է մյուս բացակայությունները։ Իսկ այն ժամանակ մեր բանակի ստեղծմանը քչերը կհավատային։ Ես այն քչերից էի, որ հավատում էի հայ ժողովրդի առնականությանը, բայց մտածում էինք՝ գուցե մեր հակառակորդները մի բան գիտեն, որ ասում են, թե դուք զինվոր ժողովուրդ չեք, դուք պետական ժողովուրդ չեք։ Նրանք ասում էին, որ մենք միշտ վասալ ենք եղել, ու պետականություն երբեք չենք ունեցել։ Այդքանի հետ մեկտեղ, մենք հռչակեցինք պետություն, որի մեջ շատ հետաքրքիր խմբավորումներ կային»։
Ասում են, որ դա այն պահն էր, որին չէր կարող չմասնակցել Հայաստանի մտավորականության կորիզը, դա այդպե՞ս էր․ «Առաջին լրատվական»-ի հարցին Ազատ Արշակյանը պատասխանեց․ «Այո։ Ընդհանրապես, դա մտավորականի գործ է և բոլորը գիտեին, թե ուր են գնում։ Գիտեինք, որ անկախություն հռչակելը բերելու է փորձություն։ Տագնապներ կային։ Իրոք, մենք չգիտեինք, թե ինչ կլինի, որովհետև նույնիսկ 30 տարի հետո զգուշությամբ ենք ասում անկախություն։ Այն ժամանակ էլ կար մարդկանց մի խումբ, որոնք ասում էին՝ ումի՞ց եք անկախանում, որովհետև հանրության մեջ կային այնպիսի մարդիկ, որոնք չէին պատկերացնում, որ Հայաստանը կարող է ինքնուրույն պետություն լինել՝ առանց որևէ մեկի ձեռքի տակ գտնվելու»։
Մանրամասները՝ տեսանյութում։
