Ադրբեջանական ANS PRESS-ի փոխանցմամբ՝ երեկ Թուրքիայի վարչապետ Էրդողանի և Ադրբեջանի նախագահ Իլհամ Ալիևի միջև տեղի ունեցած տետ ա տետ և ընդլայնված կազմով հանդիպումներից հետո կողմերը մամլո ասուլիս են տվել։
Ալիևը քննադատել է Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) զինյալների կողմից հուլիսի կեսին Դիարբեքիրում 13 թուրք զինծառայողների սպանությունը։
«Խստորեն դատապարտում ենք PKK-ի գործունեությունը, մենք բազմիցս շարադրել ենք տվյալ հարցում մեր դիրքորոշումը։
Եվս մեկ անգամ ցանկանում եմ ասել, որ Ադրբեջանը PKK–ն ճանաչում է որպես ահաբեկչական կազմակերպություն, և նրա դեմ պայքարում մշտապես գտնվում է թուրքական պետության ու թուրք ժողովրդի կողքին։ Մենք կտրականապես դատապարտում ենք ահաբեկչության բոլոր ձևերը և վստահ ենք, որ ահաբեկչության դեմ պայքարը կարող է արդյունավետ լինել միայն այն դեպքում, եթե բոլոր պետությունները միավորեն իրենց ջանքերը»։
Էրդողանն իր հերթին ընդգծել է, որ հպարտ է PKK-ի հարցում Ալիևի այդ վճռական դիրքորոշումից, ինչի համար շնորհակալ է նրան. «Դա մեր եղբայրության, միասնության նշանն է»։
Հիշեցնենք, որ 1978 թվականին քուրդ առաջնորդ Աբդուլլահ Օջալանի հիմնադրած PKK-ի ընդլայնված զինված պայքարը Թուրքիայում սկսվել է 1984 թվականին, ինչի արդյունքում երկու կողմից զոհվել է 40-45.000 մարդ:
