Գովազդային ստանդարտների բրիտանական կոմիտեն (ASA) արգելել է L’Oreal ընկերությանը Ջուլիա Ռոբերթսի և սուպերմոդել Քրիսթի Թըրլինգթոնի հետ գովազդային ակցիա անցկացնել՝ մեղադրելով ընկերությանը «ֆոտոշոփի» ակտիվ օգտագործման մեջ: Այս մասին հայտնում է կոմիտեի պաշտոնական կայքը:
Գովազդի բրիտանական կոմիտեն նման որոշում է ընդունել խորհրդարանի պատգամավոր Ջո Սվինսոնի բողոքից հետո, որը նման դրսևորումների դեմ ստեղծված կազմակերպության հիմնադիրներից մեկն է:
Սվինսոնը հայտարարել է, որ Maybelline և Lancome կոսմետիկ միջոցների գովազդումը, որոնք պատկանում են L’Oreal-ին, անբնական պատկեր է ստեղծում և շատ կանանց գցում մոլորության մեջ,- հայտնում է Marketing Week կայքը: Սվինսոնը նաև ավելացրել է, որ և՛ Ջուլիա Ռոբերտսը, և՛ Քրիստի Տերլինգտոնը գեղեցիկ են ի ծնե և նման միջոցների կարիք չունեն:
Ինչպես գրում է The Guardian թերթը, L’Oreal ընկերությունը ընդունել է, որ մոդելների նկարները վերափոխվել են համակարգչային ծրագրերի միջոցով, սակայն նշել է, որ դա անհրաժեշտ է կոսմետիկ նյութերի էֆեկտն ընդգծելու և ի ցույց դնելու համար:
Սակայն Մեծ Բրիտանիայի գովազդային կոմիտեն որոշել է, որ Ռոբերթսի և Թըրլինգթոնի պաստառներն արված են «ֆոտոշոփի» չարաշահմամբ և դրանով իսկ կարող են գնորդին գցել մոլորության մեջ՝ սխալ կարծիք ստեղծելով միջոցի իրական որակի մասին: Կոմիտեում հայտարարել են, որ ընկերությունը խախտում է գովազդային ստանդարտները, և գովազդը պետք է դադարեցվի:
