Ուկրաինացի դատախազները դիմել են դատարանին՝ խնդրելով «գազային գործով» անցնող Ուկրաինայի նախկին վարչապետ Յուլիա Տիմոշենկոյին վերցնել կալանքի տակ՝ փոխելով նրա խափանման միջոցը: Այս մասին հաղորդում է ուկրաինական УНИАН գործակալությունը: Քիչ առաջ դատարանը մերժել է այդ խնդրանքը:
Տիմոշենկոն արդեն հասցրել է այս խնդրանքը որակել որպես դատախազ Ալեքսանդր Միկիտենկոյի՝ «ընդդիմությանը ոչնչացնելու» վերջին քայլը։ Հիշեցնենք, որ «գազային դատավարությունը», որով Ուկրաինայի նախկին վարչապետը մեղադրվում է պաշտոնական դիրքի չարաշահման և 2009 թ. Ռուսաստանի հետ այնպիսի գազային պայմանագրի ստորագրման մեջ, որը մեծ վնաս է հասցրել պետությանը, մեկնարկել է այս տարվա հունիսին: Տիմոշենկոն կտրականապես հերքում է բոլոր մեղադրանքները՝ հայտարարելով, որ իրեն հետապնդում են քաղաքական դրդապատճառներով:
Հիշեցնենք նաև, որ դատավարության գրեթե ամեն օրը զուրկ չէ սկանդալներից: Դատավարության ընթացքում հաճախակի են ծեծկռտուքները: Դրանց բավական ակտիվ մասնակցում են Տիմոշենկոյի ֆրակցիայի պատգամավորները: