Վրացական GHN լրատվական գործակալության փոխանցմամբ՝ Ուկրաինայում Ռուսաստանի պատրիարք Կիրիլ Բ-ի հետ ունեցած հանդիպման ժամանակ Վրաստանի պատրիարք Իլյա Բ-ն հայտարարել է, որ քաղաքական գործիչները գալիս ու գնում են, սակայն ժողովուրդներն ու եկեղեցիները մնում են.
«Այսպիսի մասնավոր հանդիպումներն անարդյունավետ չեն մնա։ Իսկապես, քաղաքական գործիչները գալիս ու գնում են, սակայն ժողովուրդներն ու եկեղեցիները մնում են։ Մենք պետք է աջակցենք միմյանց, ամեն ինչ անենք, որպեսզի մեր հարաբերությունները լինեն եղբայրական, բարեկամական»։
Իլյա Բ-ն Կիրիլ Բ-ին նաև շնորհակալություն է հայտնել նրա համար, որ վերջինս հաստատել է, որ Աբխազիան և Հարավային Օսիան գտնվում են Վրաց Ուղղափառ եկեղեցու իրավասության ներքո.
«Կարծում եմ, որ մենք հետագայում նույնպես հանդիպելու ենք։ Սա բարի սկիզբ է, և կարծում եմ, որ շարունակությունը նույնպես շատ բարի պետք է լինի, և մենք փոխըմբռնման ոգով կգտնենք խնդիրների հաղթահարման ուղիները»։
Իլյա Բ-ն նաև շնորհակալություն է հայտնել իրեն «Սուրբ քաղաք»՝ Կիև հրավիրելու համար։
Հիշեցնենք, որ Իլյա Բ-ն Կիև է ժամանել հուլիսի 25-ին՝ մասնակցելու հուլիսի 28-ին Ռուսիո մկրտության օրվա տոնակատարությանը։ Իլյա Բ-ի ուկրաինական այցն ավարտվում է հուլիսի 30-ին։
