«Անգամ 1 օր առաջ արժե արտահերթ ընտրություններ անել: Օրը նշանակություն չունի: Արտահերթ՝ նշանակում է, որ հասարակությունը չհամաձայնեց ստեղծված իրավիճակին»,- այսօր ասուլիսի ժամանակ հայտարարեց ՀԱԿ ներկայացուցիչ Հրանտ Բագրատյանը՝ համոզմունք հայտնելով, որ արտահերթ ընտրություններ անպատճառ կլինեն:
Նրա խոսքով, ՀԱԿ-ն իշխանությունից կոնկրետ քայլեր է սպասում՝ ընտրական օրենսգրքից պետք է հանվի մեծամասնական ընտրությունների մասին հոդվածը և պետք է անցկացվեն միայն համամասնական ընտրություններ: Հ. Բագրատյանը պատմեց, թե ինչպես նախորդ ընտրությունների ժամանակ տեղամասերից մեկում «կարգ ու կանոնը պահպանելու համար» իրեն է մոտեցել հայտնի գողականներից մեկը՝ ոստիկանների հետ միասին. «Գողականները կրկին գալու են տեղամասեր: Մենք առաջարկում ենք ձևականությունները վերացնել և ասել, որ ոստիկանապես Ալիկ Սարգսյանն է ընտրությունների պատասխանատուն»:
Հ. Բագրատյանը շեշտեց, որ թեև ԿԸՀ-ն ներկայացնում են իբրև անկախ մարմին, սակայն ո՛չ Գարեգին Ազարյանը, ո՛չ ՄԻՊ-ը, ո՛չ փաստաբանների պալատը անկախ չեն:
ՀԱԿ-իշխանություն երկխոսության վերաբերյալ Հ. Բագրատյանը նշեց, որ ՀԱԿ-ը մեծ ռիսկի է գնացել, ակնկալիքներ կան, բայց ոչ այնպիսին, ինչպիսին Դավիթ Հարությունյանն է ասել: «Բա այս կերպ երկխոսո՞ւմ են: Մենք կարիք չունենք Դավիթ Հարությունյանի խոսքերը լսելու: Մենք գիտենք, որ ինքը ոնց էլ գցես, կատվի պես ոտքերի վրա է կանգնելու: Ճարտար լեզու, խոսքեր: Մենք գործողություն ենք ուզում տեսնել: Եվ պատահական չէ, որ այն, որ երկխոսության միջոցով պարտաստ ենք վիճակը փոխելու, սա հենց իշխող ուժն է, Սերժ Սարգսյանն է ասել, և ասել է դեսպաններին, որ իրոք գնում է երկխոսության: Բայց երկխոսությունը ո՞րն է: Բլա-բլա՞ն»,- ասաց Հ.Բագրատյանը:
Ի դեպ, Հ.Բագրատյանը նշեց, որ 2-3 անգամ իշխանությունը դրված է եղել սկուտեղին, բայց ՀԱԿ-ը չի վերցրել՝ մեկն ընտրություններից հետո, մեկն այս տարվա մարտին, իսկ հիմնական պատճառը Ղարաբաղի ճակատագրով մտահոգությունն է եղել, որի շուրջ վիճակն օրհասական է:
