Грузия Online-ի փոխանցմամբ՝ երեկ երկօրյա այցով Վրաստան է ժամանել Լեհաստանի նախագահ Բրոնիսլավ Կոմորովսկին, որի հետ Վրաստանի նախագահ Միխեիլ Սաակաշվիլին հանդիպել է Բաթումում։ Հանդիպման ժամանակ Սաակաշվիլին հայտարարել է, որ Վրաստանն ու Լեհաստանը միմյանց հետ կապված են հատուկ հարաբերություններով, ինչը շարունակվելու է նաև հետագայում.
«Վրաստանը գտնվում է զարգացման հետաքրքիր փուլում։ Չնայած պատերազմին ու օկուպացիային՝ մենք կարողացանք լուրջ քայլեր ձեռնարկել զարգացման ճանապարհին։ Վրաստանն աշխարհում կոռուպցիայի դեմ պայքարի առաջամարտիկներից է։
Համաշխարհային բանկի տվյալներով՝ մենք աշխարհի առաջին տնտեսական բարեփոխիչներն ենք։ ԵՄ-ի հետազոտության համաձայն՝ Իսլանդիայից հետո մենք երկրորդ անվտանգ երկիրն ենք։
Միևնույն ժամանակ մենք հետևում ենք Լեհաստանի զարգացմանը։ Լեհաստանը բոլորից լավ հաղթահարեց համաշխարհային ճգնաժամը, ինչը հաջողվեց Լեհաստանի ներկայիս կառավարության իրականացրած բարեփոխումների շնորհիվ»։
Սաակաշվիլին հավելել է, որ իրենք հետաքրքրությամբ սպասում են սեպտեմբերին Վարշավայում տեղի ունենալիք արևելյան գործընկերության հարցերի շուրջ առաջիկա գագաթնաժողովին։
Կոմորովսկին իր հերթին նշել է, որ Լեհաստանն աջակցելու է թե՛ ՆԱՏՕ-ին, թե՛ ԵՄ-ին Վրաստանի անդամակցությանը։
Հիշեցնենք, որ հուլիսի 1-ից սկսած՝ Լեհաստանը 6 ամիս ժամկետով ստանձնել է ԵՄ-ի նախագահությունը։
