Լուրեր
Ավտոտրանսպորտային միջոցներում գրանցված հրդեհների թիվն ավելացել է
  • 16:02
  • 2020-07-13
  • Դիտումներ՝ *

Հայաստանում, ընթացիկ տարվա առաջին կիսամյակում, ավտոտրանսպորտային միջոցներում գրանցվել է հրդեհի 176 դեպք:

«Արմենպրես»ի մամուլի սրահում հրավիրված ասուլիսում ՀՀ ԱԻՆ հրդեհային և տեխնիկական անվտանգության հետաքննության վարչության պետի տեղակալ Սերգեյ Հայրապետյանը նշեց, որ այս ցուցանիշը նախորդ տարվա նույն ժամանակահատվածի համեմատ ավելացել է: 2019 թվականի առաջին 6 ամսում ավտոտրանսպորտային միջոցներում գրանցվել է 146 հրդեհի դեպք: Սերգեյ Հայրապետյանը նշեց, որ տրանսպորտային միջոցներում հրդհեների թվի ավելացումը տեղի է ունենում վերջին տարիներին մեծ քանակով մեքենաների ներկրմանը զուգահեռ:

«Ավտոմեքենաներում հրդեհների առաջացման պատճառները տարբեր են, լինում են խնդիրներ վառելիքային համակարգի հետ կապված, պատճառ կարող է լինել ավտոմեքենաների հնամաշ լինելը, մարդկային անզգուշությունը: Շատ դեպքեր կան, երբ հասարակ կրակմարիչի առկայության դեպքում հնարավոր կլիներ կանխել հրդեհի տարածումը»,-ասաց Սերգեյ Հայրապետյանը:

Սերգեյ Հայրապետյանը նկատեց, որ շատ ավտոմեքենաներ աշխատում են գազային համակարգով: Լինում են դեպքեր, երբ գազաբալոնները, տեղադրված են լինում ոչ մասնագետների կողմից: Դրանք վաղ, թե ուշ պայթում են: Մասնագետի խոսքով՝ գազաբալոնների պայթելու հետ կապված իրավիճակը բավական բարելավվել է, քանի որ վերջին տարինեին այդ ուղղությամբ առկա են խստացումներ:

«Նախկինում շատ վատ վիճակ էր, հաճախակի լինում էին ավտոմեքենաների գազաբալոնների պայթյուններ: Բարեբախտաբար, տարբեր գերատեսչությունների համատեղ ու հետևողական աշխատանքի շորհիվ այսօր իրավիճակը բավական բարելավվել է, ամեն դեպքում խնդիրը դեռ կա»,- ասաց Սերգեյ Հայրապետյանը:

  • Դիտումներ՝ *