ՌԴ նախագահ Վլադիմիր Պուտինը անվտանգության խորհրդի նիստում քննարկում էր հետխորհրդային տարածքի ինտեգրացիայի խորացման հարցերը: Անվտանգության խորհրդի նիստում թեմայի քննարկումը, շատերի պնդմամբ, վկայում է այն մասին, թե հարցը ներկայումս Ռուսաստանի համար ինչ քաղաքական նշանակության մակարդակում է: Կան պնդումներ, որ նոր աշխարհակարգի ձևավորման աշխույժ և բավականին բուռն մրցակցության պայմաններում Ռուսաստանն ակնհայտորեն ետ է մնում՝ նաև օբյեկտիվ պատճառներով, և Մոսկվան փորձելու է բռի մեջ պահել ավանդական ազդեցության գոտիները, այդ թվում՝ նաև Հայաստանը: Ի՞նչ զարգացումներ կարելի է սպասել հայաստանյան ներքաղաքական կյանքում՝ հաշվի առնելով նաև այն, որ հայաստանյան որոշ ուժեր և սուբյեկտներ Ռուսաստանին ծառայելու կոչեր են հնչեցնում:
Թեմայի շուրջ «Առաջին լրատվական»-ի հետ քննարկմանը մասնակցեցին «Իմ քայլը» խմբակցության պատգամավոր Միքայել Զոլյանը և «Հանուն հանրապետության» քաղաքական նախաձեռնության անդամ, քաղաքագետ Ռուբեն Մեհրաբյանը:
«Շատ հետաքրքիր անցում էր ՌԴ անվտանգության նիստի օրակարգից դեպի մեր ներքաղաքական օրակարգ, ինչը խիստ ուշագրավ է: Մեր ներքաղաքական որոշ հանգուցյալ և որոշ մեռելածին սուբյեկտների կողմից փորձեր եղան մուրալու ինչ-որ տանիք կամ միջամտություն դրսի ուժերից: Նրանք հետևում են իրադարձություններին՝ փորձելով օգտակար լինել այդ հաշվարկների մեջ, բայց այդպիսի նախադրյալներ չկան, քանի որ կա մի կարևոր գործոն, որը դա թույլ չի տա. դա այն է, որ Հայաստանի ժողովուրդը պարզապես չի հանդուրժի արտաքին միջամտություն Հայաստանի ներքին կյանքին, և այդ միջամտության փորձերը կընդունի ամենակոշտ ձևերով՝ «կրակահերթերով», այնպես որ թող ոչ ոք նման միջամտությունների իլյուզիաներ չունենա»,- նշեց Ռուբեն Մեհրաբյանը:
Միքայել Զոլյանի խոսքով՝ խոր ինտեգրացիայի շուրջ քննարկումներ են ընթանում ԵԱՏՄ անդամ երկրների միջև. «Ամեն դեպքում մենք բոլոր ձևաչափերին մասնակցում ենք՝ ելնելով Հայաստանի տնտեսական և քաղաքական շահերից, որևէ ինտեգրացիոն ձևաչափ չի կարող զարգանալ Հայաստանի ինքնիշխանության հաշվին»:
Մանրամասն՝ տեսանյութում: