«Կենտրոնական բանկի նախագահի կողմից դա պարզապես վաղաժամկետ գնահատական է, որովհետև տնտեսական աճի հետագա փոփոխությունը մեծամասամբ կապված է համավարակի հետ, ուստի այստեղ կա երկու կարևոր հարց. առաջինը՝ դեռ ինչքա՞ն է շարունակվելու համավարակը, երկրորդ՝ ի՞նչ չափեր է ընդունելու այն. այստեղ, եթե հետադարձ հայացք գցենք անցած ամիսներին՝ մարտից-հուլիս, ապա, նախևառաջ, պետք է գնահատական տալ այն բանին, թե տնտեսության վրա ինչպիսի ազդեցություն են թողել նախորդ չորս ամիսները, ինչպես նաև հասկանալ, թե առաջիկայում ինչ չափեր է ընդունելու համավարակը: Որքան ես եմ հասկանում համավարակի ծավալը գնալով ոչ թե նվազում է, այլ ընդլայնվում, ընդ որում՝ ոչ միայն Հայաստանում, այլև ամբողջ աշխարհում, ընդհուպ՝ ԱՀԿ-ն էլ է հայտարարում է, որ դեռ չենք հասել պիկին, ինչը նշանակում է, որ առաջիկայում էլ վիրուսի տարածումը շարունակվելու է:
Սրանից զատ՝ կարևոր է հասկանալ նաև, թե պարետատան որոշումներն ինչպիսի ազդեցություն կունենան տնտեսության այս կամ այն ճյուղի վրա։ Այսինքն՝ պարետը ելնելով այն հանգամանքից, որ վարակակիրների թիվը գնալով ավելանում է, կարող է կրկին սահմանափակումներ մտցնելու որոշում կայացնել, ինչը, բնականաբար, կազդի տնտեսական գործունեության վրա»,- «Առաջին լրատվական»-ի հետ զրույցում ընդգծեց տնտեսագետ Աշոտ Մարկոսյանը՝ անդրադառնալով ՀՀ Կենտրոնական բանկի կանախատեսումներին։
Հիշեցնենք, որ ՀՀ ԿԲ նորընտիր նախագահ Մարտին Գալստյանը օրերս լրագրողների հետ հանդիպման ժամանակ հայտարարել էր, որ կորոնավիրուսի համավարակի հետևանքով Հայաստանում 2020թ-ին տնտեսական անկումը կազմելու է 4 տոկոս, իսկ 2021թ-ի վերականգնումը՝ 5․5 տոկոս, ինչը նշանակում է, որ հաջորդ տարի արդեն ակնկալվում է տնտեսական աճի դրական ցուցանիշ ունենալ։
Աշոտ Մարկոսյանի խոսքերով՝ հաշվի առնելով վերոնշյալ հանգամանքները՝ այս պահի դրությամբ, թերևս, շատ դժվար է տնտեսական անկման կամ գալիք տարվա համար տնտեսական աճի մասով ճշգրիտ թվեր կանխատեսելը․ ավելին՝ ԿԲ նախագահի կողմից հրապարկաված կոնկրետ 4 տոկոս անկումը, ըստ Մարկոսյանի, որոշ ռիսկեր հաշվի չառնելու և ժամանակավրեպ եզրակացություններ անելու հետևանք է։
Ինչ վերաբերում է Մարտին Գալստյանի այն հայտարարությանը, որ կորոնավիրուսի տարածման կանխատեսվող համաշխարհային երկրորդ ալիքի դեպքում անգամ ՀՀ ԿԲ-ն ի զորու է ապահովել Հայաստանի ֆինանսական և բանկային համակարգի կայունությունը, Աշոտ Մարկոսյանը նշեց․
«Ես կարծում եմ, որ Հայաստանի տնտեսությունը, հատկապես ֆինանսական շուկան, այդքան էլ մեծ չի և, ըստ էության, այն հնարավորությունները, որոնք ունի ԿԲ-ն՝ իր ենթակառուցվածքներով, հնարավորություն է տալիս այդ կայունությունը պահպանել, մանավանդ, երբ ԿԲ-ի գործիքակազմը կոնկրետ է ու հայտնի։ Հետևաբար, համամիտ եմ, որ ֆինանսական կայունությունը պահպանելը հնարավոր է և իրատեսական։ Մենք այսօրվա դրությամբ ունենք անհրաժեշտ ռեզերվները, որոնք ֆորս-մաժորային իրավիճակներում կարող ենք առանց որևէ խոչընդոտի օգտագործել ըստ անհրաժեշտության, ուստի ԿԲ-ն կրկնում եմ՝ կկարողանա ապահովել դրամավարկային այդ կայունությունը»։