Նախօրեին մենք գրել էինք, որ Ոստիկանության նախկին գնդապետ Սայաթ Շիրինյանը, որը փաստացի հանդես է գալիս որպես Ռոբերտ Քոչարյանի աջակից, նաև բիզնես կապերով է կապված Քոչարյանների հետ։ Գրել էինք, որ մեզ հասած տեղեկություններով՝ Շիրինյանը «Մարտին սթար» չիպսերի, արևածաղկի սերմերի ու պահածոների արտադրությամբ զբաղվող ընկերության համասեփականատեր է։ Շիրինյանը, մասնավորապես, ընկերության դեպի Ղազախստան արտահանումների պատասխանատուն է։ «Մարտին սթար»-ը կամ նույն ինքը՝ «Օտ Մարտինա» ընկերությունը նույնպես ներգրավված է Քոչարյանի բիզնեսներում և փոխկապակցված է «Էլիտ գրուպ» ՍՊԸ-ի հետ։ «Այսինքն՝ մեր ունեցած տեղեկությունների և վերլուծության արդյունքում կարելի է եզրակացնել, որ «Մարտին սթար» ՍՊԸ-ն նույնպես Քոչարյանի բիզնեսներից է»,- գրված էր մեր հրապարակման մեջ։
Հրապարակումից հետո մենք ստացել ենք «Մարտին սթար» ընկերության պատասխանը, որտեղ ասվում է, որ Սայաթ Շիրինյանը չի հանդիսանում և երբեք չի հանդիսացել «Մարտին սթար» ՍՊԸ-ի մասնակից, ավելին, նշված անձը առնչություն, փոխկապակցվածություն ևս չունի «Մարտին սթար» ՍՊԸ-ին։ Սայաթ Շիրինյանը չի հանդիսանում ընկերության՝ դեպի Ղազախստան արտահանումների պատասխանատուն։
««Մարտին Սթար» ՍՊԸ-ն ներգրավված չէ Քոչարյանի բիզնեսներում, ավելին՝ չունի որևէ առնչություն նշված սուբյեկտի հետ։ Ընկերությունը փոխկապակցված չէ նաև «Էլիտ գրուպ» ՍՊԸ-ին։ Այս փաստական տվյալները չեն համապատասխանում իրականությանը, իսկ հոդվածում վկայակոչված անձինք և ընկերությունը որևէ կերպ չեն առնչվում «Մարտին սթար» ՍՊԸ-ին»,- ասված է ընկերության ուղարկած պատասխանում։
Ընկերությունը նաև ապացույցներ է ներկայացրել, որոնք ևս փաստում են, որ «Մարտին սթար» ՍՊԸ-ն ոչ մի կապ չունի Շիրինյանի ու առավել ևս Քոչարյանների հետ:
Ուստի հարկ ենք համարում մեր ընթերցողներին տեղեկացնել, որ մեր կողմից հրապարակված լուրը իրականությանը չի համապատասխանում: