Ադրբեջանական Trend լրատվական գործակալության փոխանցմամբ՝ Վրաստանի նախագահ Միխեիլ Սաակաշվիլին Թբիլիսիում կատարել է համակարգիչների խոշոր գործարանի բացումը։ Ձեռնարկությունը հանդիսանում է վրացական «Ալգորիթմ» ընկերության և Intel համաշխարհային համարգչային հսկայի համատեղ նախագիծ։
Համակարգիչների գործարանն ունի մոտ 1000 աշխատակից, որոնց թվում են նաև տեղեկատվական տեխնոլոգիաների արհեստավարժ քոլեջի շրջանավարտները։
Միայն այս տարի գործարանն արտադրելու է 60,000 նեթբուքեր՝ առաջին դասարանցիների համար։ Հետխորհրդային տիրույթում նմանատիպ մասշտաբի ձեռնարկություն առկա է միայն Ռուսաստանում։
Գործարանի բացման արարողակարգի ժամանակ Սաակաշվիլին հայտարարել է, որ սա պատմական պահ է՝ ընդգծելով, որ Վրաստանում սկսել է գործել բարձր տեխնոլոգիաների գործարան. «Նոր ուսումնական տարուց սկսած դպրոց հաճախող բոլոր երեխաները, այդ թվում նաև իմ հնգամյա որդին, ով առաջին անգամ գնալու է դպրոց, կունենան այդ նեթբուքերը։
Այս ամենի արդյունքը մենք ռեալ կտեսնենք 10-15 տարի անց։ Սակայն առաջին արդյունքը կլինի ներկայումս. մեզ մոտ կաճի նոր սերունդ, որը կտա նոր արտադրանք։
Հաջորդ քայլը կլինի այն, որ Բաթումում կբացվի տեխնոլոգիական համալսարան, ուր տեխնոլոգիական քոլեջի շրջանավարտները կշարունակեն իրենց ուսումը։ Նրանք կստեղծեն 21-րդ դարի վրացի ինժեներների ու տեխնոլոգիաների ընտրանին, որն էլ իր հերթին կվերածվի համաշխարհային ընտրանու մի մասի»։
Հիշեցնենք, որ ավելի վաղ նշվում էր, թե Թբիլիսիում գտնվող համակարգիչների գործարանը պետք է տարեկան արտադրի տարբեր տիպերի 300,000 կտոր համակարգիչ։ Վրացական արտադրության համակարգիչները կարտահանվեն Ադրբեջան և Հայաստան։
