Թուրքական Radikal թերթի փոխանցմամբ՝ այս տարվա հունվարի 8-ին Թուրքիայի վարչապետ Էրդողանի կողմից «այլանդակ» հորջորջված Կարսի՝ արդեն նախկին մարդկության (հայ-թուրքական բարեկամությունը խորհրդանշող) հուշարձանի վայրում երկու հոլանդացի զբոսաշրջիկներ յուրօրինակ բողոքի ակցիա են իրականացրել։
Երեկ երեկոյան Կարս ժամանած հոլանդացիներ 34-ամյա Էլկե Մերիժեն և 32-ամյա Վոութեր Էնթոնը մատների տարբեր շարժումներ պատկերող արձանիկներ (ֆիգուրներ) են տեղադրել նախկին հուշարձանի վայրում։ Այդ ֆիգուրներից մեկն էլ պատկերել է հանրահայտ «միջնամատը»։
Դրանից հետո հոլանդացի զբոսաշրջիկները լքել են «դեպքի վայրը»։ Սակայն նրանց արարքը չի վրիպել թուրքական ոստիկանության աչքից, ով հետաքննություն է ձեռնարկել տեղի ունեցածի կապակցությամբ։
Հոլանդացի զբոսաշրջիկների արարքը չի վրիպել նաև տեղաբնակ երեխաների աչքից, ովքեր իրենց հետ տարել են այդ ֆիգուրները։
Նշվում է, որ նախքան Կարս այցելելը, հոլանդացի զբոսաշրջիկները Ստամբուլում հանդիպել են Կարսի հուշարձանի հեղինակ Մեհմեթ Աքսոյի հետ։
Հիշեցնենք, որ 2006 թվականին կառուցված Կարսի հուշարձանի ապամոնտաժման գործընթացն ամբողջությամբ ավարտվել է հունիսի 14-ին։
