Կենսաթոշակային համակարգի տվյալների շտեմարանից, 2011 թ. մայիսի 1-ի դրությամբ, առանձնացվել են ճշգրտման ենթակա 37,026 կենսաթոշակառուների տվյալներ, ճշտելուց հետո 26,196 կենսաթոշակառուի վճարվել է մայիս ամսվա կենսաթոշակը:
Հունիսի 1-ի դրությամբ, առանձնացված 10,705 տվյալները ճշգրտելուց հետո 3,381 կենսաթոշակառուի վճարվել է հունիսի կենսաթոշակը, հուլիսի 1-ի դրությամբ դեռևս առկա են չճշգրտված տվյալներով 6 249 կենսաթոշակառու: Այսօր ասուլիսի ժամանակ ներկայացնելով այս տվյալները՝ ՀՀ աշխատանքի և սոցիալական հարցերի նախարար Արթուր Գրիգորյանը հայտնեց, որ գործընթացը շարունակվում է:
Նրա խոսքով, պարզվել է, որ հաշմանդամ ճանաչված 816 կենսաթոշակառուների ԲՍՓ գործակալության կողմից տրամադրված քաղվածքների, հաշմանդամների հաշվառման «Փյունիկ» տեղեկատվական համակարգի շտեմարանի և կենսաթոշակների տեղեկատվական շտեմարանի տվյալների միջև առկա են հաշմանդամության խմբերի անհամապատասխանություններ, որի արդյունքում արձանագրվել է 1299.9 հազ. գերավճար գումար:
«2012 թ. հունվարից կենսաթոշակային համակարգի բազան ամբողջությամբ նույնականացված կլինի»,- հավաստեց Ա. Գրիգորյանը:
Նախարարը տեղեկացրեց, որ, հուլիսի 1-ի դրությամբ, ծառայության աշխատակազմի 42 տարածքային ստորաբաժանումներում ավարտվել է կենսաթոշակի գործերի գույքագրումը և կատարված ուղղումների արդյունքում 1 ամսում խնայվել է 10,991.6 հազ. դրամ: Տարիքային թույլատերի սահմանից 1 տարի շուտ կենսաթոշակի անցած անձանց վճարվել է կենսաթոշակ, թեև նրանք աշխատել են: Նախարարի ասելով՝ վճարված ավելի գումարը մոտ 12 մլն դրամ է, որը պետք է ետ գանձվի: 5 դեպքերում կրկնակի կենսաթոշակ է վճարվել, գերավճարը կազմել է 3 մլն 343 հազ. դրամ: Կարգավորվել են նաև ներքին կառավարման խնդիրները, որի արդյուքնում ողջ հանրապետությունում կենսթոշակները վճարվում են յուրաքանչյուր ամսվա առաջին 2-3 աշխատանքային օրերի ընթացքում:
Մարդկանց տվյալները ճշգրտելու, կատեգորիաները հստակեցնելու, ինչպես նաև պետական բյուջեում համապատասխան միջոցների արդյունքում ավելացել են հաշմանդամ զինծառայողներին և զոհված զինծառայողների ընտանիքների անդամներին տրվող գումնարները՝ զինծառայության ժամանակ հաշմանդամ դարձած հրամանատարական կազմի զինծառայողներին տրվող գումարի միջին չափն աճել է 1-ին խմբի հաշմանդամինը՝ 35 %-ով, 2-րդ խմբի հաշմանդամինը՝ 33 %-ով, 3-րդ խմբի հաշմանդամինը՝ 31 %-ով: Պարտականությունները կատարելիս զոհված շարքային զինծառայողի ընտանիքի անդամերին և հրամանատարական կազմի զոհված զինծառայողի երկկողմանի ծնողազուրկ երեխաներին տրվող գումարի չափերն աճել են 21 %-ով, իսկ շարքային կազմի զինծառայողների երկկողմանի ծնողազուրկ երեխաներին տրվող գումարի չափն աճել է 50 %-ով:
Ա. Գրիգորյանի խոսքով, ընտանեկան նպաստի համակարգում հաշվառված ընտանիքների տվյալների ճշգրտման արդյունքում 3 հազ. ընտանիք դուրս է մնացել համակարգից: Հունիսի դրությամբ, ընտանեկան նպաստի իրավունք ունի 92,698 ընտանիք:
«Առաջին լրատվական»-ի հարցին, թե, ընդհանուր առմամբ, այս տարվա առաջին կիսամյակում որքա՞ն գումար է խնայվել, և ո՞ւր են ուղղվելու միջոցները, Ա. Գրիգորյանը պատասխանեց, որ կենսաթոշակային համակարգում խնայվել կամ չի վճարվել շուրջ 4 մլրդ դրամ, ընտանեկան նպաստի համակարգում՝ 2.7 մլրդ դրամ, սակայն դեռ չի որոշվել, թե այդ գումարներն ուր են ուղղվելու: Ըստ նրա, հանրապետությունից դուրս գտնվող կենսաթոշակառուները հնարավոր է՝ վերադառնան տարեվերջին և ստանան իրենց թոշակները: