Գլխավոր դատախազությունը հայտնել է, որ չի կարող լինել ԲՀԿ նախագահ Գագիկ Ծառուկյանին անձեռնմխելիությունից զրկելու հարցը խորհրդարան տանելու քաղաքական որոշում, քանի որ հարցը զուտ իրավական է, և ըստ այդմ՝ այդպիսին լինելու պարագայում կարող է լինել միայն իրավական որոշում:
Այդուհանդերձ հստակ է, որ իրավապահների վարքագիծը թելադրվելու է քաղաքական մթնոլորտով, եթե ոչ՝ անմիջական քաղաքական որոշումով: Հասկանալի է, որ Գագիկ Ծառուկյանին անձեռնմխելիությունից զրկելու որոշումը ունենալու է լրջագույն քաղաքական նշանակություն, ըստ այդմ՝ հազիվ թե իրավապահները ներկայիս նուրբ իրավիճակում գնան այդպիսի որոշումների առանց համոզման, որ քաղաքական ղեկավարությունը դա չի դիտարկի, օրինակ, հարված թիկունքից կամ սաբոտաժ:
Միևնույն ժամանակ պետք է նկատել, որ անձեռնմխելիությունից զրկելը ամենևին չի ենթադրում միարժեք կալանավորում: Բանն այն է, որ այդ քայլին գնալը կարող է թելադրված լինել զուտ քրեական գործով Գագիկ Ծառուկյանի կարգավիճակը փոխելու անհրաժեշտությամբ: Ներկայումս նա ունի վկայի կարգավիճակ, մեղադրյալի կարգավիճակ դարձնելու համար ևս անհրաժեշտ է ստանալ խորհրդարանի թույլտվությունը, ոչ թե միայն կալանավորման: Դրանք առանձին գործընթացներ են, և եթե առաջանա կալանքի անհրաժեշտություն, այդ դեպքում լինելու է առանձին հայցում խորհրդարանին:
Այդ գործընթացին Հայաստանի հանրությունը ծանոթ է մի քանի աղմկոտ դեպքերից, որոնցից մեկը դարձյալ առնչվում էր ԲՀԿ-ին, սակայն ոչ թե նրա նախագահին, այլ մի շրջափուլ ԲՀԿ թերևս ամենաարմատական ներկայացուցչին՝ Վարդան Օսկանյանին, որը դիտարկվում էր ԲՀԿ-ում քոչարյանական թևի ներկայացուցիչ: Վարդան Օսկանյանի հանդեպ գործընթացը տեղի էր ունենում 2012-15-ի շրջափուլում, երբ ԲՀԿ-ն ոչ իշխանական բևեռի գլխավորությամբ ըստ էության հայտարարել էր իշխանափոխության նպատակի մասին: Օսկանյանին մեղադրում էին փողերի լվացման գործի համար, որը ԲՀԿ-ականները համարում էին հորինված և մտացածին: Միաժամանակ Վարդան Օսկանյանի արմատական քննադատությունը ԲՀԿ նախագահն ու կուսակիցները համարում էին նրա անձնական կարծիք՝ անհատապես փաստորեն պատասխանատվություն չստանձնելով այդ կարծիքի համար: 2015-ին Ծառուկյանի քաղաքական էջը փակվելուց հետո Վարդան Օսկանյանի գործն էլ, այսպես ասած, «փակվեց», իսկ քոչարյանական թևը լքեց կուսակցությունը:
Միևնույն ժամանակ, սակայն, իրադարձությունների զարգացումը հուշում է, որ ԲՀԿ խնդիրը կամ քոչարյանական թևը չէր ամենևին, կամ այդ թևն ամենևին չի հեռացել և մեծ հաշվով ունի շատ ավելի լայն իմաստ և նշանակություն, քան ուղղակի երկրորդ նախագահին ենթակա լինելը: Մյուս կողմից, սակայն, հատկանշական է, որ այս անգամ արմատականությունը դրվում է ուղիղ Գագիկ Ծառուկյանի վրա, ինչը նշանակում է, որ նրան չեն թողնում նահանջի ճանապարհ, որն ունենում էր նախկինում, երբ անձամբ խուսափելով արմատականությունից՝ խփում էր, ժողովրդական լեզվով ասած, թե՛ նալին, թե՛ մեխին:
Կզրկեն նրան անձեռնմխելիությունից, թե ոչ՝ պարզ չէ, բայց որ թե նալին, թե մեխին խփելու հնարավորությունց զրկեցին՝ ակնառու է: