Եվրոպական խորհրդարանը Հայաստանի մասին առնվազն տարօրինակ հայտարարություն է տարածել: ԵԽ-ում Հայաստան-Ադրբեջան-Վրաստան-ԵՄ պատվիրակության նախագահը, Եվրոպական խորհրդարանում Հայաստանի հարցերով մշտական զեկուցողը և Ադրբեջանի հարցերով մշտական զեկուցողը հանդես են եկել համատեղ հայտարարությամբ Հայաստանի և Լեռնային Ղարաբաղի միջև նոր մայրուղու կառուցման վերաբերյալ։ Նրանք մտահոգություն են հայտնել Հայաստանի և Արցախի այդ նախաձեռնության վերաբերյալ:
Թեմայի շուրջ «Առաջին լրատվական»-ի հետ քննարկմանը մասնակցեցին «Հանուն Հանրապետության» նախաձեռնության անդամ Սարգիս Գրիգորյանը, վերլուծաբան Գոռ Մադոյանը և քաղաքագետ Արմեն Վարդանյանը:
Սարգիս Գրիգորյանի դիտարկմամբ՝ Եվրոպական խորհրդարանի հայտարարությունն անակնկալ չէր, քանի որ նման հայտարարություններ շատ են եղել, այլ հարց է, որ անհրաժեշտ էր նախապես աշխատանք կազմակերպել գործընկերների հետ, երկար ժամանակ բացթողում է եղել. «2018թ. հետո ստեղծվել է ստարտային հնարավորություն, մի քանի ուղղություններով պետք է աշխատել»:
Արմեն Վարդանյանի խոսքով՝ ԵԽ հայտարարության մոտիվացիան շատ պարզ է՝ Ադրբեջանը կաշառել է՝ խավիարային դիվանագիտությունն է գործի դրել:
Գոռ Մադոյանը, անդրադառնալով դիտարկմանը, որ հայտարարության հեղինակներից մեկն Ալիևի ընկերն է, նշեց. «Քանի որ նախադեպեր ունեցել ենք այդպիսի կաշառվածության և այդպիսի հայտարարությունների, այս հայտարարությունն էլ կասկածի տեղիք է տալիս, բայց դա չի բացառում նաև հայկական կողմի աշխատանքի թերացումը: Անհրաժեշտ էր մեր գործընկերներին ներկայացնել, որ այդ նախաձեռնությունը լոգիստիկ բնույթ չունի, այլ Հայաստանը, լինելով Արցախի անվտանգության երաշխավորը, անվտանգության խնդիրներ է լուծում. դա շատ կարևոր է»:
Անդրադառնալով դիտարկմանը, որ վարչապետ Նիկոլ Փաշինյանի՝ կորոնավիրուսով վարակվելու մասին հայտարարությունը Հայաստանում ոմանք Մոսկվա չմեկնելու պատրվակ համարեցին, Սարգիս Գրիգորյանը նշեց, որ նման խոսակցություններ կան, բայց շատ կարևոր է, որ մոսկովյան այցը տեղի է ունենալու ուժային կառույցներում փոփոխություններ իրականացնելուց հետո. «Փաշինյանը մոսկովյան այս այցին հանդես կգա ուժեղի դիրքերից»:
Արմեն Վարդանյանի դիտարկմամբ՝ ՀՀ-ՌԴ հարաբերություններում որոշակի լարվածություն կա այս փուլում և դա հաճախ տեսանելի է, հաճախ՝ ոչ տեսանելի:
Վարչապետի այցից առաջ ռուսական լրատվամիջոցները նորից հիշել են Հայաստանի երկրորդ նախագահին: Արմեն Վարդանյանի խոսքով՝ Քոչարյանի գործոնը լրացուցիչ լծակ է Մոսկվայի ձեռքին, որով փորձում է ճնշում գործադրել Հայաստանի վրա. «Բացի դրանից՝ Պուտինը անձնական վիրավորվածություն ունի, քանի որ մերժվել է նրա խնդրանքը՝ ազատ արձակել իր ընկերոջը՝ Ռոբերտ Քոչարյանին»:
Մանրամասն՝ տեսանյութում:
