Գագիկ Ծառուկյանի մամուլի խոսնակ Իվետա Տոնոյանը հայտարարել է, որ Ծառուկյանն արդեն իսկ բազմաթիվ հանդիպումներ է ունեցել քաղաքական ուժերի և հասարակական սեկտորի ներկայացուցիչների հետ։ Հիշեցնենք՝ օրեր առաջ ԲՀԿ առաջնորդը առողջ ուժերին համախմբման կոչ էր արել՝ պահանջելով կառավարության կազմի 100 տոկոսանոց փոփոխություն։ Ենթադրո՞ւմ էր սա արդյոք նաև վարչապետի հրաժարականի պահանջ, թե՞ ոչ՝ հստակեցրին վերջինիս թիմի ներկայացուցիչները։ Մասնավորապես, ԲՀԿ պատգամավոր Արման Աբովյանը հայտարարել է, որ պահանջում են Նիկոլ Փաշինյանի գլխավորությամբ կառավարության հրաժարականը։
Որոնք են այն առողջ ուժերը ու կազմակերպությունները, որոնց հետ Ծառուկյանն այս օրերին հանդիպումներ է ունենում՝ հստակ չէ։ Արդյոք դրանք կլինեն ռևանշիստական նկրտումներ ունեցող, նախկին համակարգին աջակցո՞ղ ուժերը. ամենայն հավանականությամբ՝ այո, քանի որ հեղափոխությանն աջակցած, բայց այս փուլում իշխանություններին որոշ հարցերի շուրջ քննադատող ուժերն իրենց այդ դաշտում չեն տեսնում։
«Ժողովրդավարական հայրենիք» կուսակցության նախագահ Պետրոս Մակեյանն «Առաջին լրատվական»-ի հետ զրույցում ասաց՝ որքան էլ կան դժգոհություններ իշխանությունների վարած քաղաքականության որոշ դրույթների շուրջ, նման հակաիշխանական միավորումներում իրենք չեն լինի, հանդիպման առաջարկ էլ չեն ստացել: «Այսօրվա իրավիճակում, եթե գործընթացները գնան համախմբման, Քոչարյանի ասած՝ «կոնսենսուս մինուս մեկ» սկզբունքով, դա կլինի Հայաստանի պետականության վերջը։ Կիրակի օրը մեր կուսակցությունում քննարկում եղել է, հանդես եկանք հայտարարությամբ, որ հինգերորդ շարասյունը ընդունակ է ամեն ինչի՝ վտանգելով Հայաստանի Հանրապետությունն ու Արցախը։ Հիմա Ծառուկյանը, փաստորեն, հոկտեմբերի 2-ի տարբերակով համախմբման գործընթաց է սկսել։ Մենք այդ դաշտում գոյություն չունենք»,- ընդգծեց նա։
Այս համախմբման մեջ չի լինի նաև «Սասնա ծռեր» համահայկական կուսակցությունը։ «Առաջին լրատվական»-ի հետ զրույցում կուսակցության քարտուղարության համակարգող Վարուժան Ավետիսյանն ընդգծել է, որ իրենց համար վիրավորական է հինգերորդ շարասյան հետ համեմատվելը, իրենք այս փուլում իշխանությունների հրաժարականը չեն պահանջի։
«Ժառանգություն» կուսակցության նախագահ Նարինե Դիլբարյանն «Առաջին լրատվական»-ի հետ զրույցում նշեց՝ այսօր երկրում արտակարգ իրավիճակ է, Հայաստանում ստեղծվել է բարդ իրավիճակ. «Մեզ զարմացնում է, որ վարչապետն ինքը չի նախաձեռնում այդպիսի տարբեր ձևաչափերով հանդիպումներ ու ազգային համաձայնության մթնոլորտի ձևավորում։ Եթե խորհրդարանում մեծությամբ երկրորդ, ընդ որում՝ իրենց չփոխած ԸՕ-ով ընտրված երկրորդ ուժի ղեկավարը նման նախաձեռնություն է ցուցաբերում, ապա պետք է տարբերակել հետևյալ շերտերը։ Ցանկացած քննադատություն, որն ունի իրական հիմքեր, պետք է վերլուծել, քննարկել, ելքեր մշակել թույլ տված բացթողումները շտկելու համար։ «Ժառանգությունն» իր հայտարարությամբ նշել է, որ ինքը պահանջում է պարետատան և առողջապահության ոլորտի պատասխանատուների հաշվետվությունն ու ապա հրաժարականը։ Պաշտոնական որևէ արձագանք մենք չենք ստացել։ Ճիշտ է՝ այսօր տեսնում ենք թվերի կտրուկ փոփոխություն, հատկապես առողջացածների առումով. եթե մի քանի օր շարունակվի այս միտումը, ապա մենք միայն ուրախ կլինենք»։
Այդուհանդերձ, մեր զրուցակիցն ընդգծեց՝ քննարկումներն ու ազգային համաձայնության մթնոլորտի ձևավորումը Հայաստանի համար օրախնդիր նշանակություն ունեցող հարցերի շուրջ խիստ կարևոր են. «Դա ոչ միայն առողջապահության ոլորտն է, այլև էներգետիկ խնդիրները։ Միջազգային էներգետիկ կորպորացիաները նշում են, որ գազն ու նավթը երբեք իրենց պատմության մեջ այդքան ցածր գին չեն ունեցել, իսկ մեր պատկան մարմինները նշում են, որ այդ գինը պետք է բարձրանա։ Ուստի «Ժառանգությունը» քննարկումների պատրաստ է։ Ես անձամբ «Սասնա ծռերի» ու այլ ուժերի նախաձեռնած քաղաքական բևեռի քննարկումներին մասնակցել եմ, պատրաստ ենք խոսել նաև Գագիկ Ծառուկյանի հետ այս խնդիրների շուրջ»։
Մեր այն դիտարկմանը, թե Ծառուկյանի առաջ քաշած օրակարգը կառավարության 100 տոկոսանոց հրաժարականն է, Նարինե Դիլբարյանն արձագանքեց. «Այս իրավիճակում կառավարության 100 տոկոսանոց փոփոխություն «Ժառանգությունն» իբրև մեծ օրակարգ իր համար չի սահմանել։ Բայց այն, որ կառավարությունում տարվող կադրային քաղաքականությունը չի համապատասխանում ճգնաժամային իրավիճակում տարվող քաղաքականությանը՝ դա հստակ է։ Առայժմ «Ժառանգությունը» նման խնդիր չի դրել։ Մենք կողմնակից ենք ոչ թե անձնական կամ կուսակցական մտերմությամբ մարդկանց պաշտոն տալուն, այլ մասնագետների համար ասպարեզ բացելուն։ Մենք իբրև քաղաքական կուսակցություն ուզում ենք ստեղծել այդ հարթակը, ու եթե կան համընկնումներ, ապա, այո՛, մենք դա կարող ենք քննարկել և՛ ԲՀԿ-ի, և՛ «Լուսավոր Հայաստանի» հետ, նաև՝ «Իմ քայլի» հետ, որից առաջինն էինք սպասում։ Կարծում եմ՝ Նիկոլ Փաշինյանը ոչ միայն «Իմ քայլի» վարչապետն է, այլև ընդհանրապես Հայաստանի Հանրապետության»։
