ՌԴ նախագահի մամուլի խոսնակ Դմիտրի Պեսկովը պատասխանել է այն հարցին, թե ինչու Ուկրաինայի նախագահ Վլադիմիր Զելենսկուն չեն հրավիրել Մոսկվա՝ Հաղթանակի շքերթին մասնակցելու, հաղորդում է «Գազետա»-յի թղթակիցը:
Ըստ նրա, Ուկրաինան դե ֆակտո ԱՊՀ անդամ չէ եւ երբեք էլ ցանկություն չի ցուցաբերել այդ ուրախությունը կիսելու համար:
«Շեշտը դրված է ԱՊՀ պետությունների ղեկավարներին պաշտոնական հրավերների վերականգնման վրա: Կան նաև մեր գործընկերները, ովքեր ցանկություն են հայտնել գալ: Ինչպես գիտենք, Ուկրաինան դե ֆակտո և, շատ առումներով դե յուրե, ԱՊՀ անդամ չի, ցանկություն չի հայտնում շարունակել աշխատել այս կառույցում և երբեք չի ասել Հաղթանակի օրվա ուրախությունը մեզ հետ կիսելու իր ցանկության մասին», – ասաց Պեսկովը:
Մայիսի 9-ին Հաղթանակի օրվա ավանդական շքերթը չեղյալ հայտարարվեց կորոնավիրուսային համաճարակի պատճառով: Ռուսաստանի նախագահ Վլադիմիր Պուտինը հայտարարեց, որ տոնակատարությունը տեղափոխվում է հունիսի 24-ին:
