Վարչապետ Նիկոլ Փաշինյանը հունիսի 24-ին կմեկնի Մոսկվա, որտեղ ներկա կլինի Հաղթանակի շքերթին, որ անցկացնում է Պուտինը: Խոսքը մայիսի 9-ի շքերթի մասին է, որը հետաձգվել էր անորոշ ժամանակով, և օրեր առաջ Պուտինը Շոյգուին անսպասելի հանձնարարեց պատրաստվել շքերթին:
Ի դեպ, հատկանշական է, որ դրանից մեկ շաբաթ անց էլ՝ հուլիսի 1-ին, Պուտինը ծրագրել է սահմանադրական հանրաքվեի քվեարկությունը, որով փոփոխություններ են կատարվում իշխանության հիերարխիայում, և գլխավորը՝ զրոյանում են Պուտինի նախագահական ժամկետները, ինչը նրան տալիս է հնարավորություն առաջադրվելու ևս երկու անգամ՝ ներկայիս ժամկետը սպառելուց հետո:
Հայաստանի վարչապետը հունիսի 8-ին հայտարարեց կորոնավիրուսի վարակը հաղթահարած լինելու մասին: Վարակված լինելու մասին նա հայտարարել էր հունիսի 1-ին: Նույնը օրը ծննդյան օրվա առիթով Փաշինյանին զանգահարել էր ՌԴ նախագահը: Հեռախոսազրույցի ընթացքում Հայաստանի վարչապետը հույս էր հայտնել, որ մինչ շքերթը կապաքինվի և կկարողանա մասնակցել հունիսի 24-ին Մոսկվայում սպասվող միջոցառումներին:
Հետաքրքիր էր այն, որ նույն հեռախոսազրույցի մասին Կրեմլի տարածած հաղորդագրության մեջ չկար անդրադարձ այդ թեմային: Դա հետաքրքիր էր նրանով, որ Պուտինի համար շքերթը լոկ տոն կամ հուշ չէ, այլ քաղաքական խաղաքարտ, քարոզչաքաղաքական խաղաքարտ: Այդ իմաստով Կրեմլի հաղորդագրության մեջ դրա մասին հիշատակման բացակայությունը հուշում է, որ շքերթի մասնակցության համատեքստի առումով Երևանն ու Մոսկվան հեռախոսազրույցի ընթացքում չեն եկել որոշակի ընդհանուր հայտարարի: Ինչ է փոխվել անցնող շաբաթվա ընթացքում՝ բացի, իհարկե, այն իրողությունից, որ Հայաստանի վարչապետը փաստորեն բուժվել է վարակից և այդպիսով նաև ձեռք բերել դրա նկատմամբ իմունիտետ:
Անցնող շաբաթվա ընթացքում կամ շաբաթավերջին փոխվել է Հայաստանում ուժային բլոկը՝ ԱԱԾ պետ, ոստիկանապետ, ԶՈՒ ԳՇ պետ: Ուժային բլոկի փոփոխությունը եղել է կորոնավիրուսից վերադարձած վարչապետի ուժեղ պատասխանը ներքաղաքական կյանքում աշխույժ շարժումներին, որ անում են նախկին իշխող համակարգը ներկայացնող սուբյեկտներ, և որոնց անցնող շաբաթվա ընթացքում դե ֆակտո միացել էր նաև խորհրդարանի երկրորդ ուժի՝ ԲՀԿ առաջնորդը:
Այդպիսով, Նիկոլ Փաշինյանը Պուտինի հետ հեռախոսազրույցից հետո ստացել է Գագիկ Ծառուկյանի «մարտահրավերը» կամ գուցե մարտահրավերը Ծառուկյանով «միջնորդավորված» և տվել է դրա պատասխանն ուժային բլոկում նշանակալի փաթեթային փոփոխությամբ, որտեղ ակնառու է այն հանգամանքը, որ նշանակվել են վարչապետ Փաշինյանի համար անձնապես վստահելի մարդիկ:
Մոսկվա շքերթի Նիկոլ Փաշինյանը մեկնում է ուժերի այդ հարաբերակցությամբ, այլ կերպ ասած՝ բավականին ուժեղ ներքաղաքական դիրքով: