Երեկ ուշ երեկոյան Ազգային ժողովի Ապրիլյան պատերազմի հանգամանքներն ուսումնասիրող քննիչ հանձնաժողովի անդամները տեսակապով զրուցել են Արցախի նախկին նախագահ Բակո Սահակյանի հետ և հարցաքննել նրան:
Ըստ էության Բակո Սահակյանը հանձնաժողովի վերջին հյուրն էր։ Այսօր ավարտվում է Ազգային ժողովում Ապրիլյան պատերազմի հանգամանքներն ուսումնասիրող քննիչ հանձնաժողովի գործունեության ժամկետը։ Հանձնաժողովում այս ընթացքում հրավիրվել են նախկին իշխանության ներկայացուցիչներ, այդ թվում՝ երրորդ նախագահ Սերժ Սարգսյանը, պաշտպանության նախարար Սեյրան Օհանյանը, մի շարք զինվորականներ, հրամանատարներ։ Օրերս տեսակապով զրույց է եղել նաև Ռուսաստանում գտնվող ՀՀ նախկին արտգործնախարար Էդվարդ Նալբանդյանի հետ։
Հրավիրվածներից միայն ՀՀ զինված ուժերի գլխավոր շտաբի նախկին պետ Յուրի Խաչատուրովը հրաժարվեց ներկայանալ ու բացատրություններ տալ։ Ընդ որում, նա արդեն երկու անգամ է հրաժարվել ներկայանալ հանձնաժողովի նիստերին և պատասխանել պատգամավորների հարցերին:
Հանձնաժողովի նախագահ Անդրանիկ Քոչարյանը հայտարարել է, որ Խաչատուրովը շատ լավ գիտի, թե ինչ է պարզել հանձնաժողովը, և դա է նրա հրաժարվելու պատճառը։
Ապրիլյան պատերազմի հանգամանքներն ուսումնասիրող հանձնաժողովի աշխատանքները, բացահայտումները կարևորում են նաև Արցախում։ «Առաջին լրատվական»-ի հետ զրույցում Արցախի նախագահ Արայիկ Հարությունյանի խորհրդական, նախկինում նախագահ Բակո Սահակյանի աշխատակազմի ղեկավարի տեղակալ Դավիթ Բաբայանը «Առաջին լրատվական»-ի հետ զրույցում ասաց՝ առաջին փուլը փաստորեն ավարտված է, տարբեր մարդկանց կարծիքներ լսվել են, ու հիմա իրենք սպասում են, որ ամենը ի մի բերվի ու դրա հիման վրա մի նյութ պատրաստվի. «Ես կարևորում եմ, որ համազգային ցանկացած խնդիր խորաթափանց ուսումնասիրվի՝ առանց շահարկումների, հնարավորինս օբյեկտիվ ձևով։ Մենք այդպիսով ավելի լայն պատկերացում կունենանք թե՛ տեղի ունեցածի և թե՛ իրականացված աշխատանքների մասին»։
Ըստ Բաբայանի՝պետք է հնարավորինս զերծ մնանք քաղաքականացնելուց. «Այդպիսով մենք ավելի օբյեկտիվ պատկերացում կունենանք, բազմակողմանիորեն կդիտարկենք մարտահրավերը։ Կան երևույթներ, որոնք փակ պետք է լինեն, կան տվյալներ, որոնք չի կարելի հանրայնացնել։ Դա ազգային անվտանգության հետ կապված հարց է։ Բայց այն, ինչ կարելի է մատուցել հանրությանը, պետք է արվի հնարավորինս օբյեկտիվ ու համապարփակ ձևով։ Դրա նպատակը կլինի էլ ավելի ուժեղացնել մեր պետականությունն ու զինված ուժերը, կոնսոլիդացնել մեր հանրությանը»։
Կարո՞ղ է պարզվի, որ եղել են մեղավորներ նաև նախկին իշխանություններից, կամ եղել են որոշակի պայմանավորվածություններ՝ հարցին ի պատասխան մեր զրուցակիցն ասաց. «Ես կարծում եմ, որ ադրբեջանական կողմի հետ պայմանավորվածություն չէր կարող լիներ։ Դա ոչ այլ ինչ, քան… չեմ էլ ուզում որակավորում տալ։ Անթույլատրելի եմ համարում նաև աշխարհաքաղաքական շահարկումներ անելը, որովհետև մենք պետք է ճիշտ աշխարհաքաղաքականություն վարենք։ Առհասարակ միշտ պետք է մտապահենք՝ անընդհատ այլ կողմերին մեր խնդիրների մեջ մեղադրելը ճիշտ չէ։
Եկեք խորը նայենք և առաջին հերթին փնտրենք մեր մեջ։ Մեր խնդիրների մեծ մասը գալիս է ներսից, ինչքան էլ դառը լինի՝ սա է ճշմարտությունը։ Այլ երկրներ կարող է ունենան իրենց շահերը, պետք չէ զարմանալ։ Բայց հարցն այն է, թե մենք ինչպես ենք օգտագործում մեր ու ուրիշների հնարավորությունները ու ինչ ենք մենք ուզում»։
