Այսօրվա լրահոսում ամենաշատն առանձնանում է կորոնավիրուսից մահացածների անձնական տվյալների արտահոսքի մասին տեղեկությունը: «Ֆեյսբուքում» հայտնվել են կորոնավիրուսից մահացած մարդկանց տվյալները, որոշ լրատվամիջոցներ տարածել են: Անգամ բարձր տեխնոլոգիաների մասնագետները դժվարանում են ասել, թե դա ինչպես էր հնարավոր: Այս խնդիրը լուրջ է և ուղիղ առնչվում է ազգային անվտանգությանը:
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Միքայել Զոլյանը, վերլուծաբան Հակոբ Բադալյանը և կառավարման հարցերով փորձագետ, «Հանուն հանրապետության» նախաձեռնության անդամ Հայկ Այվազյանը:
«Թվային աշխարհ, տեղեկատվական տեխնոլոգիաների գերզարգացվածություն. այս ամենն իր հետ բերում է նաև տեղեկատվական արտահոսքերի ռիսկեր: Պետք է բացահայտվի, թե ինչպես է տեղի ունեցել արտահոսքը և հանրությանը համոզիչ ներկայացվի, որ այդ ամենը վերահսկման ենթակա է և դա բացառություն կարող է լինել, ոչ թե վտանգավոր շարունակություն ունեցող զարգացում… ԱԱԾ-ն պետք է զբաղվի այս հարցով»: Վերլուծաբանի դիտարկմամբ՝ սա տեղեկատվական աշխարհին բնորոշ հանցագործության տեսակ է դարձել, և սրա դեմ պայքարը պետք է լինի գլխավոր ուղղություններից մեկը բոլոր երկրներում:
Միքայել Զոլյանի խոսքով՝ տեղեկատվական պատերազմ է մղվում Հայաստանի դեմ և հիմա, կորոնավիրուսի հետ կապված, այն ավելի է ակտիվացել: «Սա դատապարտելի արարք է… Հասարակության իմունային համակարգը, որը պետք է այսպիսի վտանգները չեզոքացնի, այնքան էլ լավ չի աշխատում, այստեղ շատ աշխատանք ունենք անելու»:
«Պետք է կոնկրետ մարդկանց պատժել, երբ որ գործ ունենք տեղեկատվական դիվերսիայի հետ, հուսով եմ՝ ԱԱԾ-ն դրանով զբաղվում է, և արդյունքներ կլինեն: Բայց հիմնական հակահարվածը պետք է լինի ճշգրիտ տեղեկատվության տեսքով»,- ընդգծեց պատգամավորը:
Հայկ Այվազյանը կարևորեց բացահայտումը, թե այս արտահոսքն ինչ ճանապարհով է տեղի ունեցել, ում նախաձեռնությամբ և ինչ նպատակով. «Եվ դա կկանխի հաջորդ նման դեպքերը»:
Հակոբ Բադալյանի դիտարկմամբ՝ կորոնավիրուսի գործոնը շատ քաղաքական ուժեր և միավորներ փորձում են օգտագործել իրենց քաղաքական նպատակների համար:
Հայկ Այվազյանի խոսքով՝ պայքար է մղվում հեղափոխության դեմ: Քննարկման մասնակիցների կարծիքով՝ նախկինների ռեստավրացիան ազգային անվտանգության խնդիր է:
Մանրամասն՝ տեսանյութում:
