Այն կանայք, որոնք երեխաներ ունեն, չպետք է նստեն տանը` երեխայի համար թողնելով աշխատանքը: Ինչպես պարզել են գիտնականները, մոր զբաղվածությունը, ընդհակառակը, լավ է անդրադառնում երեխայի էմոցիոնալ և հոգեբանական զարգացման վրա: Լոնդոնի համալսարանական քոլեջի գիտնականներն ուսումնասիրելով գիտական հետազոտության արդյունքները, որտեղ հաշվի են առնվել 19 հազար երեխաների վերաբերյալ տվյալներ, փորձել են պարզել, թե արդյոք կապ կա՞ ծնողների աշխատանքային պայմանների և իրենց երեխաների սոցիալական բարեկեցության միջև: Այս մասին գրում է The Telegraph-ը:
Գիտնականները պարզել են, որ այն մտավախությունը, համաձայն որի՝ եթե մայրը ծննդաբերելուց հետո մեկ տարվա ընթացքում վերադառնում է աշխատանքի, վատ է անդրադառնում երեխայի վրա, բացարձակ անհիմն է: Ինչպես գրում են մասնագետները, աշխատանքը վատ հետևանքների չի հանգեցնում: Ընդհակառակը՝ այն կարող է օգտակար լինել, քանի որ թույլ չի տալիս կնոջն ընկնել դեպրեսիայի մեջ: Բացի այդ, պարզվել է, որ եթե մայրն աշխատանքի է անցնում ծննդաբերելուց հետո մեկ տարվա ընթացքում, ապա երեխաների մոտ ավելի հազվադեպ է դիտվում հիպերակտիվություն, ագրեսիա, հիստերիկ պահվածք կամ անհանգստություն:
Հետազոտությունն իրականացրած դոկտոր Էն ՄաքՄանն ասում է, որ ամենալավ իրավիճակն այն է, երբ աշխատում են երկու ծնողներն էլ: Եթե տան հիմնական գումարն աշխատում է մայրը, դա բացասաբար է ազդում տղա երեխաների վրա, որոնք հետագայում ագրեսիվության նշաններ են դրսևորում: Տան հոր աշխատելու դեպքում՝ դա բացասաբար է ազդում աղջիկ երեխաների վրա: Ամենավատ իրավիճակն այն է, երբ գործազուրկ են երկու ծնողներն էլ: