Շատերը կարծում են, որ սթրեսից դուրս գալու համար անհրաժեշտ է ալկոհոլ օգտագործել: Սակայն Չիկագոյի համալսարանի գիտնականներն ապացուցել են, որ դա այդպես չէ, և նկարագրել են այն պրոցեսները, որոնք տեղի են ունենում օրգանիզմում այն ժամանակ, երբ մարդիկ սթրեսային իրավիճակներում ալկոհոլ են օգտագործում: Այս մասին հրապարակումը զետեղված է Alcoholism ամսագրում:
«Որոշ մարդկանց ալկոհոլիզմը «վերակենդանացնում է», նրանք իրենց առույգ են զգում, էներգիայով լի, նրանք ձգտում են աշխատել: Մյուսներն ալկոհոլից դառնում են ավելի քնկոտ, անընդունակ՝ նորմալ շփվելու: Սակայն հետազոտությունը ցույց է տվել, որ երբ ալկոհոլը համադրվում է սթրեսի հետ, ապա բոլորի մոտ օրգանիզմի արձագանքը նույնն է»,- ասում է հետազոտության հեղինակներից մեկը՝ Էմմա Չայլդսը:
Որպեսզի պարզ լինի, թե ինչ է տեղի ունենում սթրեսի ժամանակ ալկոհոլ օգտագործելիս, գիտնականներն ընտրել են 25 առողջ տղամարդու, որոնց առաջարկել են լիցքաթափվել՝ համակարգչով քարտ խաղալով, կամ սթրեսային իրավիճակի մեջ են գցել՝ առաջարկելով ելույթ ունենալ անշնորհակալ հանդիսատեսի դիմաց: Դրանից հետո 11 կամավորների երակ ալկոհոլ պարունակող նյութ են ներարկել, իսկ 14 մյուս կամավորներին՝ պլացեբո՝ կեղծ դեղ:
Պարզվել է, որ ալկոհոլն իջեցնում է սթրես-հորմոնի՝ կորտիզոլի առկայությունն արյան մեջ, սակայն պահպանում է և երկարացնում է լարվածության սուբյեկտիվ զգացումը: Միաժամանակ, սթրեսը նվազեցնում է ալկոհոլից ստացած հաճույքը և ստիպում է շարունակել խմել: Ստացվում է «փակ շրջան»՝ մարդն ավելի քիչ է դրական էմոցիաներ ունենում և ավելի շատ է ցանկանում խմել: