Մեր խնդիրը հետևյալն է, որ մենք կարողանանք կարանտինի չվերադառնալով կառավարելի պահել իրավիճակը, իսկ չափանիշը կոնկրետ վերակենդանցման բաժանմունքի տեղերի առկայությունն է։ Այս մասին այսօր պարետատան նիստից հետո ասաց վարչապետ Նիկոլ Փաշինյանը՝ անդրադառնալով երկրում կրկին կարանտին հայտարարելու մասին հարցին։
Վարչապետի խոսքով իրավիճակը օր օրի ծանրանում է. «Ընդհանուր վիճակագրության հետ ավելանում է նաև ծայրահեղ ծանր հիվանդների թվաքանակը և խստացումների պարագայում իհարկե ոչ ոք չի կարող բացառել, որ մենք ստիպված կլինենք նորից վերադառնալ կարանտինին և սա կախված է այն իրավիճակից, որ մենք կունենանք, սակայն կարող է մինչ այդ խստացման այլ մեթոդներ կիրառվել, մասնավորապես կարող է որոշում կայացվել, որ դիմակ կրելը ամենուր պարտադիր է՝ անկախ նրանից բաց թե փակ տարածքում եք և սրա էֆեկտիվության գործակիցը հետևյալում է, որ ըստ էության սա ավելի հեշտ է վերահսկել, որովհետև եթե քաղաքացին տնից դուրս դիմակով չէ, արդեն կարելի է արձանագրել, որ ինքը խախտում է թույլ տվել և դա հնարավոր է արդեն վիզուալ վերահսկել։ Այս պարագայում, երբ որ դիմակի առկայությունն է պարտադիր և սա նրա համար է, որպեսզի քաղաքացին կանգառ հասնելիս կամ փակ տարածք մտնելիս պետք է օգտագործի, երբ որ քաղաքացին առանց դիմակի քայլում է, մենք չգիտենք նրա մոտ դիմակ կա թե չէ, իսկ ֆիզիկապես բոլորին ստուգել հնարավոր չէ։
