«Արտագաղթը կանխելու համար պետք է ունենանք նորմալ պետություն, դառնանք անկախ պետություն, պետք են համակարգային փոփոխություններ, ներկա համակարգը բոլոր բնագավառներում պետք է առողջանա, արմատական ձևով փոխվի: Երբ մենք ունենանք նորմալ երկիր, այդ ժամանակ էլ արտագաղթը կկանխվի»,- «Առաջին լրատվականի» հետ զրույցում նման կարծիք հայտնեց «Սարդարապատ» նախաձեռնող խմբի անդամ Ալեք Ենիգոմշյանը:
Նրա խոսքով, եթե ունենանք նորմալ և բոլոր իմաստներով հաջողակ երկիր, ոչ միայն արտագաղթը կկանխվի, այլ նաև ականատես կլինենք հայրենադարձության՝ ներգաղթի:
Այն հարցին, թե իշխանություններն ի՞նչ քայլեր են անում արտագաղթը կանխելու ուղղությամբ՝ Ա. Ենիգոմշյանը պատասխանեց, որ երկրում կատարված իրադարձությունների առարկայական դիտարկումները, նաև վերջերս վարչապետի արած հայտարարությունները ցույց են տալիս, որ իշխանությունները բացարձակապես ոչինչ չեն անում և ճիշտ հակառակը՝ քաջալերում են արտագաղթը:
